Балтач районы Балтач бистәсендә яшәүче Альбина Әскарова кул эшләре белән электән кызыксына. Бәйли, ыргак белән җептән мунчала әзерли. Соңгы вакытта аларны сатуга куя башлаган.
Альбина Балтач урта мәктәбендә башлангыч сыйныфларны укыта. Ире Ришад белән өч бала үстерәләр: Гадел — автотранспорт техникумында, кызлары Зилә — XI, төпчекләре Зилия II сыйныфта белем ала.
— Кул эшләре белән башлангыч сыйныфларда укыганда ук кызыксындым. III сыйныфта түгәрәккә язылдым. Укытучым Клара апа энә белән ыргак тотарга, бәйләргә өйрәтте, — дип искә ала Альбина. — Башта энә белән кофта, оекбашлар бәйләдем. Чөнки ыргак белән ул чакта әллә ни оста эш итә белми идем. Өченче балага йөккә узгач, мунчалага тотындым.
Альбина башта гади мунчала бәйли, аннары, интернеттан күреп, төрле уенчык формасында эшләнгәннәренең серенә төшенә. Бу һөнәргә олы кызын да өйрәтә. Хәзер буш вакытта Зилә дә булыша.
— Бер кичтә 4-5 мунчала әзерли алам. Ә уенчык кебекләре озаграк бәйләнә, чөнки вак детальләре вакытны ала, — ди Альбина. — Баштарак үзебезгә, туган-тумачага бүләккә бәйли идем. Хәзер әкренләп сатуга чыгарабыз. Гадиләре
55 сумнан сатыла. Уенчык мунчала белән күп кызыксына башладылар. Аларының бәясе — 80 сум. Бәйрәм алдыннан күп сорыйлар. Укытучы булып хезмәт куйгач, кул эшләренә буш вакыт бик калмый. Шуңа каникул, ял көннәрендә бәйлим.
Лилия ЙОСЫПОВА.
