Әлки районы Иске Камка авылында урнашкан “Мәктәп чишмәсе”нең (аны халык шулай дип атый) суын берничә буын эчеп үскән. Суы йомшак, тәмле, иң мөһиме — юшкынсыз. Ул еллар дәвамында яңартылып торган. Узган ел аны үзара салым акчасына кабат төзекләндереп, 27 июльдә кулланылышка тапшырганнар.
— Авылыбыз чишмәләргә бай, — дип сөйләде Иске Камка авыл җирлеге башлыгы Фәргать Әкбәров. — Монысы күптәнге. Су торбалар аша килгәнче, авыл халкы әлеге кизләүдән файдаланды. Мәктәп укучыларына да суны шуннан ташып эчерделәр. Элек чишмә бурадан иде, аннан ул таш боҗрага алыштырылды, утырып ял итү өчен беседка төзелде, тирә-ягы койма белән уратып алынды. Былтыр авыл халкы һәм читтә яшәүче якташлар ярдәме белән кизләү заманча итеп ясалды. Озакламый шашлык, пылау пешерү өчен дә урын булдырылачак.
Хәзер кешеләр бирегә килеп су гына алмый, ял итә, бәйрәм оештыра. Моңа Иске Камка халкы бик рәхмәтле. Табигать могҗизасы, авылның бизәге булган чишмәгә һәркем җаваплы карап, аны кадерләп сакласын иде дигән теләктә калам!
Эльмира СӘЛАХОВА.
