Татарстанның элекке сәламәтлек саклау министры Адел Вафинның дәү әнисенә 100 яшь тулган. Сәлимә апа Зарипова Яшел Үзән районының Норлат авылында кызы Гөлфирә апа белән кияве Илдар абый тәрбиясендә яши.
— Балачакта курыкканда әбием кочагында тынычлык таба идем. Авылда дәү әни турында, кеше белән уртак тел табучы, мөнәсәбәтләрне җайлый белүче, оештыручы, эшлекле, диләр. Безнең әби “бизнесвумен” булган икән бит, — ди экс-министр. Адел Вафин дәү әнисенең озак яшәү серләре белән дә бүлеште.
- Туклану. Әбием: “Абыйларыбыз гел ит ашый иде, шуңа сәламәт булдылар”, — дип сөйли.
- Хәрәкәт. Авыл җирендә кеше гел хәрәкәттә. Терлеген карыйсы бар. Башка мәшәкатьләр дә җитәрлек. Кер чайкар өчен 1,5 чакрым ераклыктагы кизләүгә барырга туры килә иде. Әбием 10 ел урын өстендә яткан бабамны карады. Күрше авылга йөреп эшләде.
- Көндез йоклап алу. Мөмкинлек булган саен, азга гына булса да ятып ала.
- Үзеңә битараф булмау. Әбиемдә II тип шикәр диабеты. Ләкин ул үзен гел карап тора. Вакытында кирәкле даруларын эчә, диета сакларга тырыша, бу яшәү сыйфатын яхшырта.
- Үпкә белән яшәмәү. Әбием бүген булган борчуларны иртәгә оныта белә. Ачу сакламый, үпкәләми. Әбием тормышның кадерен белеп, яратып яши.
Эльвира МОЗАФФАРОВА.
