Азан тавышын, Коръән сүрәләрен хәзер лампа аша тыңларга була. Бу үзенчәлекле җайланманы Татарстан мөфтие Камил хәзрәт Сәмигуллинга тәкъдим иттеләр. “Коръән укый торган лампа” турында аның идея авторы эшмәкәр Булат Нигъмәтҗанов (@bulat_abu_amina) белән сөйләштек.
Булат мөселман тауарлары сату белән шөгыльләнә.
— Татарлар дөнья буйлап таралган. Коръәнне татарча укый торган гаджетларга ихтыяҗ бар иде. Татарстан Диния нәзарәтендә 40 ка якын галим 7 ел дәвамында бик зур эш башкарды — “Кәлам Шәриф”не тәрҗемә итте. “Хозур” китап нәшриятында ул аерым басма булып та дөнья күрде. “Кәлам Шәриф”кә нигезләнеп, Коръән укый торган үз лампабызны булдырдык, — ди ул.
Мондый үзенчәлекле җайланма Россиядә бердәнбер. Аудиотәрҗемәләрне татар телендә Татарстанның атказанган сәнгать эшлеклесе, журналист Илдар Кыямов, ә рус телендә Биектау районы Калинино авылында Карадениз мәчете имамы Айбек Токтосопиев (@tat134) укый. Тавышны “Азан” радиосында яздырганнар.
— Беренче партия лампа өч ай дәвамында чит илдә җитештерелде. Онлайн режимда эшләдек. Ялгышларны төзәтеп, җайланманы камилләштереп, идеаль хәлгә җиткердек. Үзенчәлекле дизайнлы, сыйфатлы, эксклюзив җайланмалар беренче көнне күпләрдә кызыксыну уятты. Дүрт көндә 200 гә якын лампа сатып алдылар. Татарстан мөфтие дә бу проектны хуплады, — ди Булат Нигъмәтҗанов.
Лампа сигез төрле төстә яна. Ул төнлә яктырта торган ут буларак та файдаланыла ала. Ләкин лампаның кыйммәте — аның аша Коръәнне тыңлап, аятьләрне ятлап булуда. Бөтен дөньяга танылган 18 хафиз сүрәләрне укый, Коръәннең тәфсире алты телдә — гарәпчә, үзбәкчә, төрекчә, фарсыча, татарча һәм русча бирелә.
Бу үзенчәлекле лампаны интернет-кибеттән сатып алырга мөмкин. Бәясе — 2700 сум. Тауарны китереп бирү хезмәте дә каралган.
Булат әйтүенчә, Аллаһ ярдәме белән киләчәктә космос, куб, цилиндр формасындагы лампалар җитештерергә ниятлиләр. Аларның үзенчәлекләрен әңгәмәдәшем әйтеп бетермәде, сер итеп калдырды.
Эльвира МОЗАФФАРОВА.
Коръән укый торган лампаны “Инстаграм”да @muslimstore_amina интернет-кибете аша алырга була.
