Безнең төбәктә үстерү өчен яхшы булган виноград сортлары белән таныштыра алмассызмы?Зәйнәп, Баулы районы.
Танылган бакчачы Франс ХӘЛИЛОВ:
— Урта полосада виноград үстереп була. Моның өчен барлык шартлар да бар: иртә өлгерешле сортлар чыгарылды, җылы вегетация чоры, кояшлы көннәр дә җитәрлек. Бездән, бакчачылардан, бу культураны ярату, үз көчеңә ышану һәм виноград үсентеләрен бакчаның иң кояшлы, якты урынына утырту гына сорала.
Бакчамда биш төрле сорт виноград үстерәм: “Алёшенькин”, “Русвен”, “Загадка Шарова”, “Памяти Домбковской” һәм “Агат Донской”. Барысы да 10 елдан артык үсә, яхшы уңыш бирә. Кышка каплап калдырам, өшегәннәре юк.
“Агат Донской” — бик иртә өлгерешле, югары уңыш бирә торган сорт. Йөземнәре кара, эре, 5-6 граммлы, әчкелтем-баллы, бик тәмле. Тәлгәшләре зур — 500-700 граммлы, 1 кг нан артканнары да була. Куагы көчле үсеш ала, -26 оСка кадәр суыкларга түзә, кышка капларга кирәк.
“Алешенькин” — бик иртә өлгерешле, югары уңыш бирә торган сорт. Җимешләре саргылт яшел төстә, эре (3-5 граммлы), баллы, тәмле. Тәлгәшләре 400-1200 граммлы була. Куак уртача үсеш ала. Урта полоса өчен иң яхшы сортларның берсе. -25 оСлы суыкларга түзә, кышка каплап калдырырга кирәк.
“Загадка Шарова” — бик иртә өлгерешле сорт. Тәлгәшләре уртача (300-400 граммлы), очлаеп үсә. Җимешләре кара, бик эре түгел (2,5-3,5 грамм тирәсе), түгәрәк, баллы, тәмле. Августның беренче-икенче декадасында өлгерә, -30 оСлы суыкларга (каплаганда -40 оСка) түзә. Шулай да бездә кышка каплап калдырырга кирәк.
“Памяти Домбковской” — иртә өлгерешле, орлыксыз кишмиш, югары уңыш бирә. Тәлгәшләре 500 граммга кадәр җитә. Йөземнәре кара, уртача зурлыкта, түгәрәк, баллы, сентябрь башында өлгерә. Көзгә кадәр ботаклары яхшы өлгереп җитә, кышка каплап калдырырга кирәк.
“Русвен” — бик иртә өлгерешле, көчле үсеш ала торган сорт. Җимешләре эре (3-5 граммлы), аксыл-алсу төстә, түгәрәк, хуш исле. Тәлгәшләре 400-600 граммлы, цилиндрланып тора. Ботаклары яхшы өлгереп җитә, -25 оСлы суыкларга түзә, Татарстан шартларында кышка каплап калдырырга кирәк.
