Мамадыш районы Норма авылында гомер итүче Шәфыйковлар хуҗалыгында багана башында җил генераторы эшли. Алар үз куллары белән ясаган әлеге җайланма беренче мәлләрдә авылдашларын бик гаҗәпләндергән. Моны Гайфулла абый белән Сәлимә апаның Мамадышта яшәүче уллары Рәмис эшләгән.
Рәмис шәһәрдә заводта хезмәт куя. Атна саен әти-әнисе янына кайтып йөри. Авыл тормышын, аеруча бакча, эретеп-ябыштыру эшләрен ярата.
— Җил генераторы кебек берәр нәрсә эшләү теләге күптән бар иде. Интернетта видеоларга күзем төште. Җил көчен файдалы эшкә кулланасым килде. Әлеге җайланманы ясауның бер авырлыгы юк. Бик чыгымлы да түгел, — ди Рәмис. — “ВАЗ-2106” машинасының генераторын кулландым. Стартеры зуррак булган саен яхшырак. Эченә көчлерәк магнитлар куйдым (неодимовые магниты), электр чыбыклары кулландым. Эретеп-ябыштырып ясадым. Багана башына куелган пропеллер җил вакытында генераторны әйләндерә, магнитлар ярдәмендә “кызып”, ток барлыкка килә. Аның белән машина аккумуляторын корам, кабель сузып, лапаска ут китертәм. Тавык-чеби ояларына ярап тора. Аларга яктылык та, җылылык та кирәк бит. Бу генератор бераз булса да электр энергиясенә экономия ясый. Исеменнән күренгәнчә, җил искәндә генә эшли. Җилсез көннәрдә ток аккумулятордан тотыла. Алга таба башка җайланмалар да ясап карарга телим.
Лилия ЙОСЫПОВА.
