Питрәч районы Көек бистәсендә яшәүче 16 яшьлек Данияр Гомәров — итальян сырлары ясау остасы. Бу эш белән ике-өч елдан бирле актив шөгыльләнә. “Яшүсмер эшмәкәр” дип йөртәләр аны. Эшне әнисе Римма белән алып баралар. Данияр бу өлкә буенча төрле проектлар төзеп, республика җитәкчелеге каршында яклап чыга. Аны хәзер күпләр таный.
— Сыр ясау технологияләре турындагы проекты өчен Президентыбыз Рөстәм Миңнеханов тарафыннан Даниярга 200 мең сумнан артыграк грант бирелде, — дип сөйли Римма. — Улымның бу уңышына бик сөендек. Проектны эшләп чыгарга якынча ике ай вакыт кирәк булды. Тырышлык үзен аклады.
Данияр 12-13 яшьлек чагында ТРның Икътисад министрлыгы тарафыннан оештырылган “Эшмәкәрләр фабрикасы” проектында катнаша. Монда Президент “хөкем”енә җиде иң кызыклы бизнес-проект тәкъдим ителә. Берсе Даниярныкы була.
— “Эшмәкәрләр фабрикасы” проектының авторы танылган ресторатор Айдар Булатов иде. Биредә төрле юнәлештә курслар оештырылды. Ул яшүсмерләр өчен төзелгән иде, — ди Римма. — Беренче биремдә үзләренә проект уйлап табарга кушылды. Күңелгә яткан бер өлкәне сайларга кирәк. Ул вакытта өйдә сыр ясыйм, Данияр мин эшләгәнне күреп кызыксына иде. “Башкалар шоколад ясый, мин сыр әзерләячәкмен”, — диде. Шулай башланып китте. Ул вакытта өч ай эчендә чама белән 22 кг каты сыр әзерләде, айга якынча 5 мең сум чиста табыш кертә башлады, 15 ләп даими сатып алучысын булдырды. Эшмәкәр булу теләге чынлап уянган иде инде. Шул чакта ук сыр ясау өчен бөтен яхшы җиһазлар булдырып, төрле сортларын җитештерүне өйрәнү, гамәлгә кертү планын куйды. Хәзер аңа 16 яшь. Сырның бөтен технологиясен белә. Итальян технологиясе белән эш итәбез. 25 төрле сыр җитештерәбез: “Моцарелла”, “Чечил”, “Халлуми”, “Канестрато” һ.б.
Римма моңа хәтле бухгалтер булып эшләгән. Хәзер өйдә, бары тик сыр ясап сату белән шөгыльләнә. Бухгалтерия эшен яхшы белүе эшмәкәрлектә булыша. Өйгә тоташтырып, сыр әзерләү өчен аерым цех булдырганнар, бөтен кирәкле җиһазлары бар. Нигездә, Данияр белән икәү эшлиләр. Кайчак әти-әнисе, туганнары да булыша.
— Сыр ясарга сөтне кайдан аласыз?
— Безгә якын булган Колай авылыннан, Лаеш районыннан җыябыз. Фермаларга үзебез барып алабыз. Чөнки безгә чиста, яхшы сөт кирәк.
— Кайларда сатасыз?
— Интернет челтәре аша заказга эшлибез, “Агропромпарк”та сатабыз. 1 кг сыр уртача 1500 сумга төшә.
Данияр Казанда “Халыкара сервис көллияте” дәүләт автоном һөнәри белем бирү учреждениесендә белем ала.
— Укырга да, эшләргә дә өлгерәм, — ди Данияр. — Узган ел, билгеле, әни белән бергә, сыр җитештереп,
370 мең сум акча эшләдек.
— Тырыш, эшчән, акыллы бала. Эшмәкәрлеккә сәләтен күрсәтте. Аннан яхшы икътисадчы да чыгар кебек, — ди әнисе, улы белән горурланып. — Киләчәктә нинди эш белән шөгыльләнәчәген бүгеннән чамалап торуы, кызыксынып, чагыштырып баруы, бу өлкәдә үсәргә тырышуы мине бик куандыра.
Лилия ЙОСЫПОВА.
