Җырчы Флера СӨЛӘЙМАНОВА чыгышы белән Кама Тамагы районы Иске Барыш авылыннан. Сугыш чоры баласы. Тормыш арбасына бик иртә җигелергә туры килә аңа. Ятимлек ачысы, авыр хезмәт, юклык заманы…
— Сынаулар шулхәтле чыныктырды. Елый белми торган итте. Беркайчан уфтанмадым, сорап йөрмәдем. Барысын да үзем тартып бардым, — ди Флера апа. — Күп күрдем. Аларны бәйнә-бәйнә сөйләсәм, әллә ничә китап язарлык. Әмма зарланмыйм. Гомер буе халкым мәхәббәтен тоеп яшәдем. Картлык көндә ялгызым түгел, балаларым кадер-хөрмәтендә торам. Безгә хәзер саулык кына кирәк. Менә анысы “дефицит”рак шул…
Флера апаның әтисе Бөек Ватан сугышында һәлак була. Озак тормый әнисе дә бакыйлыкка күчә. Биш бала ятим кала. Төпчек сеңелләре нибары 2 яшьтә була. Флера апага, үзе дә үсмер кызга, бертуганнарын да тәрбияләргә, киендерергә туры килә. 16 яшендә ул Казанга чыгып китә. Итек комбинатында эшли. Хорга йөри башлагач, композитор Сара Садыйкова белән таныша. Шушы танышу аны әкренләп сәхнә юлына кертеп җибәрә.
Легендар җырчыбызга 10 мартта 83 яшь тулды. Туу таныклыгында шулай теркәлгән. Үзе әйтүенчә, бәйрәмгә туры китереп, 8 мартта дөньяга килгән икән.
“БӘЙРӘМНӘРГӘ ЭЛЕКТӘН ИСЕМ КИТМИ”
— Флера апа, туган көн ничек узды соң? Бәйрәмнәрне яратасызмы?
— Әй, җаным (Флера апа үзен корырак, туры сүзлерәк дисә дә, ул гел шулай ягымлы итеп “җаным” дип эндәшә — Л.Й.), 83 яшьтә нинди туган көн инде. Картларча гына чәй эчтек. Балалар, оныклар килде. Әлфиям кибеттә эшли, гел тортлар ташып тора. Хәзер бернәрсәгә дә ис китми. Тәм-томнан өзелгәнебез юк.
Электән бәйрәмнәрне бар дип тә белмәдем. Эшләдек тә эшләдек. Берничәшәр айга гастрольгә чыгып китә идек. Салкын поездларда, авыллар арасында трактор арбаларында йөргән чаклар гел хәтердә. Бәйрәм итәргә яратмадым.
Туган көндә күп котладылар, сәламәтлек теләделәр. Игътибар зур булды.
— Иртән сәгать ничәдә торасыз? Көнне ничегрәк башлыйсыз?
— Соң, сәгать 8-9 ларда гына уянам. Торгач, иртәнге аш ашыйм. Ризыкта сайланмыйм, балаларым нәрсә әзерләп бирсә, шуны яратам. Үземне дөрес тукланам дия алмыйм. Организмым шул режимга ияләшкән, әйтмәгәнем булсын, алай борчыганы юк. Даруларны күп кулланырга туры килә. Мәтрүшкәле, лимонлы чәйдән өзелмим.
— Соң ятасызмы әллә?
— Төне буе телевизор карыйм. Хәзер монысын төгәллим дә ятам, дия-дия сәгать шактый уза.
— Нинди тапшыруларны яратасыз?
— Сәясәтне дә тыңлыйм, ил-көн вакыйгаларыннан хәбәрдар булып торам, төрле ток-шоуларны карыйм. Тегесен яки монысын гына яратам, дип аерып әйтә алмыйм. Күбрәк русча каналларны кушам. Радионы еш тыңлыйм.
— Берара бер-бер артлы операцияләр кичердегез… Бүген хәлегез ничек?
— 83 яшьтә яхшыра барам дип, бик теләсәм дә, әйтә алмыйм. Өй эчендә генә йөрим. Аяклар авырта. Кибеткә түгел, ишегалдына да чыга алган юк. Шулай әкрен генә торып, үз эшләремне башкарсам да, шөкер, дим.
— Көннәр җылыткач, бәлки, чыгарсыз әле.
— Саф һава рәхәт инде. Бу араларда, салкын торса да, кояш елмаебрак карый башлады. Барыбер күңелгә рәхәт. Балалар алып чыга ала. Әлегә бик ашыкмыйм, аяк асты да бозлавык.
— Концертларга әле дә чакыралармы?
— Төрле проектларда катнашуымны телиләр, чакырып торалар. Еш бара алмыйм, сәламәтлек белән бәйле, күп очракта баш тартырга туры килә. Күптән түгел Алмаз Хәмзин оештырган “Өлкәннәрдән сәлам” дип аталган концертта катнаштым.
— Сәхнәгә чыкканда бизәнергә яратасызмы?
— Артык түгел. Иренне һәм күзләрне генә бераз буйыйм, чәчне ясатам. Биткә электән “килограмм”лап крем сылый торган гадәтем юк. Табигыйлек яратам.
“УЛ ЧАКТА НИЧЕК ТӘВӘККӘЛЛӘГӘНМЕНДЕР?”
Флера апа 48 яшьтә генә гаилә кора. Дүрт бала белән тол калган иргә кияүгә чыга. “Ул чакта ничек тәвәккәлләгәнмендер, белмим. Дөрес карар кылдым. Балаларымның барысы да якын. Хәзер алар мине карый”, — ди Флера апа. Улы Марат 43 яшендә үлә. Олы кызы Алсу гаиләсе белән Мәскәүдә яши. Булат белән Әлфия — игезәкләр. Ире Габделхак абый 2009 елда йөрәк өянәгеннән үлә.
— Флера апа, балаларыгыз белән бергә яшисезме?
— Үз фатирым буш тора. Балаларым янәшәсендә яшим. Үземә генә авыр инде хәзер. Барыбыз да бер тирәдәрәк торгач, ул яктан да җайлы. Булатым да, Әлфиям дә — бөтенесе дә бик кайгырта. Бөтен теләгемне үтиләр. Терәк бар. Оныклар да бик мәрхәмәтле.
— Иске Барышта якыннарыгыз бармы?
— Күптән кайта алганым юк. Туганнар белән элемтәдә торабыз. Әти-әни кабере дә шунда. Карап, чистартып торалар. Ул яктан күңелем тыныч.
Лилия ЙОСЫПОВА.
