Әлмәт егете Эльдар Миңнегалиев 2010 елгы “Лада Приора” машинасы белән уннан артык илгә барырга, өч океан күрергә өлгергән. Автомобильдә сәяхәт итү серләре турында ул безгә дә сөйләде.
— Эльдар, спидометр ничәне күрсәтә?
— Хәзерге вакытта 267 мең км юл узганмын. Автомобиль сатып алганда, шулай сәяхәт итәрмен дип уйламаган да идем. Хәзер авылга да, чит илгә дә шул бер машинада йөрим.
— Иң беренче сәфәреңне хәтерлисеңме?
— 2015 елда эш буенча Пензага, аннары Оренбургка барырга кирәк иде. Янәшәдә генә Волгоград, аннан Казахстанга да ерак калмый, дип уйладым. Кыскасы, тәвәккәлләдем.
— Иң озын сәяхәтең хакында сөйлә әле.
— 2016 елның язында Алтын боҗра шәһәрләре-Мурманск-Санкт-Петербург, шул ук елны көз көне Пермь-Екатеринбург-Чиләбе маршруты буенча сәяхәт иттем. 2017 елда иң озын сәфәр булгандыр. Татарстаннан Владивостокка барганда, Россиянең барлык шәһәрләре аша диярлек уздым. Хәтта Монголия белән Кытайны күреп чыктым. Соңрак Грузия-Төркия, Тбилиси-Батуми-Истанбул, аннары Европа илләре буйлап Минск-Варшава-Прага-Мюнхен-Париж-Берлин шәһәрләренә дә машина белән барырга насыйп булды. Пандемия вакытында Алтайны күреп кайттым. Былтыр Архангельск, Карелия якларын урадым. Һәр сәяхәт үзенчәлекле. Барысын да фотога төшереп барырга тырышам. Сәяхәтчегә яхшы фотоаппаратка акча кызганмаска кирәк.
— Машинада сәяхәт итүнең нинди үзенчәлекләре бар?
— Еш кына рульдә туктамыйча 8-10 сәгать барырга туры килә. Озак вакыт утырырга яратмаучыларга мондый сәяхәт ошамаска мөмкин. Аның каравы машинаң белән теләгән җиргә барырга була. Тәрәзәдән матур җир күрдең, ди, туктап фотога төш, рәхәтләнеп ял ит. Маршрутны үзең төзисең. Машина белән сәяхәт итү кыйммәткә төшми. Автомобильдә йокларга йә чатыр корырга була. Йокы капчыгы, урындык, кайбер запас частьлар үзем белән йөри. Шөкер, юлда ватылганым юк.
— Тагын кайсы илгә барырга хыялланасың?
— Автомобилем яңа түгел, бик ерак юлга чыгарга шүрләтә. Шулай да быел Әрмәнстан, Азәрбайҗанга барырга теләгән идем. Тик әлегә чикләр ябык.
Эльдар МИҢНЕГАЛИЕВтан 5 киңәш:
1. Юлга чыкканчы, автомобильгә техник тикшерү уздыру мөһим. Маен алыштырасың, тәгәрмәчләрне тикшерәсең. 7-8 елдан күбрәк йөргән машинага тулы диагностика үткәрү дә комачауламый. Мин кайчак двигательне видеокамерага төшереп карыйм.
2. Юлга үзең белән антифриз, май, шәм, лампочкалар һ.б. шундый запас частьларны алырга киңәш итәм.
3. Маршрутны өйрәнсәң, федераль трассаларны сайласаң әйбәт. Әйләнгеч булса да, яхшы юл ышанычлы.
Эльвира МОЗАФФАРОВА.
