Бөдрә кара чәчле яшь актер Фәрһад Мөхәммәтҗанов “Татарстан-Яңа гасыр” каналында барган беренче татар ситкомы “Рәхәт яшибез”, “Бер-бер хәл” сериаллары аша тамашачыга танылырга өлгерде. 21 яшендә генә булса да, фикерле, талантлы, тырыш ул. Фильмнардан тыш, Кәрим Тинчурин исемендәге татар дәүләт драма һәм комедия театрында эшли башлады. Беренче сезонда ук аңа премьера спектаклендә баш рольне ышанып тапшырдылар. Фәрһаднең иҗаты, киләчәккә планнары турында үзе белән сөйләштек.
“Синең тавышыңны халык ишетергә тиеш”
— Фәрһад, кино, театр сәнгатенә килеп тә кердең, танылырга да өлгердең. Үзең белән таныштыр әле.
— Мин Азнакайдан. Гаиләдә без өч малай. Абыем Гаяз гаиләсе белән Әлмәттә яши. Абыем Илнур — Азнакайда, әле өйләнмәгән. Миңа 21 яшь. Әти мәрхүм нефтьче иде, Себердә эшләде. Әни — шәхси эшмәкәр, косметика кибете бар.
— Ничек сәнгать юлыннан китәргә булдың?
— IX сыйныфны тәмамлагач, мәктәптән китәргә карар кылдым. Әмма кайсы өлкәне сайларга икәнен хәл итмәгән идем. Әни иҗат өлкәсен хуплады, мине ландшафт дизайнеры итеп күрергә теләде. Ә әти ягы нефтьче булырга, Әлмәткә укырга керергә кушты. Тәвәккәлләдем дә, берәүгә дә әйтмичә, Әлмәт политехника көллиятенең геофизика бүлегенә укырга кердем. Тик барасым килми бит. Кыскасы, X сыйныфка калдым. Мәктәп чараларында актив катнаштым. Берсендә шигырь сөйләгәннән соң, авылдашлар: “Тавышыңны халык ишетергә тиеш”, — диде. Әни X сыйныфтан соң Казан театр училищесына кереп карарга киңәш итте. Биредә үз урынымны тапканымны аңладым. Әти ягыннан Нурдидә әбиемә, туганнарыма шушы һөнәрне сайлавыма каршы булмаганнарына рәхмәтлемен.
— Син “Зөләйха күзләрен ача” фильмында да катнаштың. Кинога ничек килеп эләктең?
— “Зөләйха күзләрен ача” фильмында Зөләйханың улы роленә кастинг үтеп карадым, алмадылар. Урам баласы ролен бирделәр.
Берсендә сәхнә теле дәресенә бер абзый керде. Ул “Ватан — XXI гасыр” кинокомпаниясе директоры Леонард Дәүләтшин булган икән, соңыннан гына белдек. Безне күзәтеп утырды да берничә кешене чакырды. Төркемдәшем Эльвина Насыйбуллина белән икебезне “Рәхәт яшибез” сериалына сайлап алдылар. Аннан “Бер-бер хәл” сериалында уйнарга чакырдылар.
“Бөдрә чәч — бәхетем”
— Фәрһад, шулай да театр үзенә тартты, ахры. Син “Ядәч! Исемдә! Бер гаилә трагикомедиясе” спектаклендә баш рольне башкарасың.
— Венгриядән килгән режиссер Сәрдәр Таһировский белән эшлибез. Премьерада аның балачагын — төп рольне уйныйм. Бу әсәр тормышка икенче төрле карарга өйрәтә. Баш рольне башкару зур җаваплылык сорый. Театр һәм кино — икесе ике төрле. Ләкин икесе дә күңелемә май булып ята.
— Бөдрә чәчең тумыштанмы?
— Әйе. Балачакта яратмый идем, турайтырга тырыштым. Режиссер Сәрдәр Таһировский, уенын-чынын бергә кушып: “Чәчең бөдрә булмаса, төп рольгә сине алмас идем”, — дип әйткән иде. Чәч актер өчен образ тудырганда, башкалардан аерылып тору өчен дә мөһим ул. Кара бөдрә чәч — минем өчен бәхет. Кайбер әсәрләрдә уйнаганда кисәргә, турайтырга кушалар.
— Бөтенроссия дәүләт кинематография институтына (ВГИК) укырга кереп карагансың икән.
— ВГИКка укырга керү өчен берничә этап үтәргә кирәк. Беренчесен читтән торып уздым. Икенчесенә институтка бардым. Мине ошаттылар. Укытучы: “Кем түләргә әзер, кулларыгызны күтәрегез”, — ди. “Күпме?” — дип кызыксынам. “Дүрт елга миллион ярым”, — ди бу. Башкаларның икеләнмичә кул күтәрүенә шаккаттым. Россиянең бердәнбер кинематография институтына төрле төбәкләрдән талантлар килә, бюджет урыннары аз. Әмма Мәскәүдә уку хыялы әле дә яши.
“Эльвина белән якын дуслар без”
— Күп сериалда Эльвина Насыйбуллина белән уйныйсың. Әллә тормышта да сез бергәме?
— Эльвина белән эшләү рәхәт, тыныч, сөйләшү, аралашу да җайлы. Без — яхшы дуслар. Йөргән кызым әлегә юк. Тулысынча иҗатка баткан чак.
— Иҗаттан тыш ниләр белән шөгыльләнәсең?
— “ТикТок” белән кызыксынам. Башта моны акча эшләү дип кенә кабул иттем. Тик сюжетлар төшерү — шулай ук иҗат. Илһам килгәндә, шигырь язам, кеше ишетмәгәндә, җырлыйм.
— Татар театрында нәрсәне үзгәртер идең?
— Татар театры кысалар белән әйләндереп алынган сыман. Шул чикләрне аз гына бозсаң да, халык шундук канәгатьсезлек белдерә. Спектакльдән кызык көтәләр. Әмма театр күңел ачу паркы түгел. Хәтта комедия дә уйландырырга, фикер уятырга тиеш. Театр халыкны үстерергә, тәрбияләргә тиеш дип саныйм.
Эльвира МОЗАФФАРОВА.
