Чыбыкчаларны тамырландыру өчен махсус стимуляторлар чыгарыла. Табигый “корневин”ны үзегез әзерли аласыз. Моның өчен алоэ согы, бал да җитә.
Стимулятор өчен 3 еллык алоэ кирәк. Аскы калынрак яфракларын үткен пычак белән кисәргә һәм, пакетка салып, берничә сәгатькә суыткычка куярга. Салкында файдалы матдәләре арта.
1 стакан суга 5-7 тамчы сок тамызырга. Чыбыкчаның киселгән урынына алоэ согы сөртергә һәм әлеге эремә салынган стаканда ике көн тотарга, аннан җиргә утыртып, каплап куярга.
1,5 л суга 1 чәй кашыгы бал кушарга. Суның температурасы 40 оСтан югары булмаска тиеш, югыйсә балның файдалы үзлекләре кими. Чыбыкчаны бал эремәсе салынган стаканда ярты көн тотарга һәм җиргә утыртырга була.