Әгерҗе районы Кырынды авылыннан Физәния һәм Флүс ШАМИЛОВлар — гел игелекле гамәлләр кылып, кешеләргә ярдәм итеп, сөендереп, үзләре дә шуның әҗерен күреп, матур яшәүче үрнәк парларның берсе. Гаилә коруларына 45 ел.
Флүс һәм Физәния бер авылда туып-үсәләр, бер сыйныфта укыйлар. Дөрес, Флүс армия хезмәтендә чакта аларга ике елга аерылып торырга туры килә.
— Армиягә озаттым, көтеп алдым. Кайтышлый ук өенә кергәнче безгә килде ул. Әнә шулай бер-беребезне яратып кавыштык та бүгенгәчә мәхәббәт ялкынын киметмичә гомер кичерәбез. Өйдә мәхәббәт хуҗа булгач, бәхет касәбез гел тулы. Һәр иртәм сөекле җәмәгатемнең аркамнан сөеп, битемнән үбеп, “Хәерле иртә!” дигән сүзеннән башлана, — ди бәхеттән балкыган Физәния ханым.
Инде үзләре гаилә корып, икешәр бала үстерүче кызлары Фирзәнә, Гөлзинә, Илзидә дә: “Безне тату гаиләдә, яратып һәм иркәләп үстерделәр. Әти-әни — безнең өчен үрнәк”, — диләр. Бәхетле парга матур гаилә серләре яхшы таныш. Аларның беренчесе ярату булса, икенчесе — ике якның да өлкәннәрен олылау. Әтисе, җиде баласын калдырып (олысына 15 яшь була), бакыйлыкка күчкәнлектән, каенатасына авыз тутырып “әткәй” дип дәшә алу бәхетенә сөенеп туя алмый Физәния. Яшьләр башка чыгып, өй салып көн итсә дә, киленнәреннән кадер-хөрмәт күреп яшиләр.
— Мич ашлары пешергәндә, үзебез ашаганчы әткәй белән әнкәйгә илтә идем. Алар калдырган хәер-дога да бәхетле яшәтә безне, — ди Физәния, тату гаиләнең тагын бер сере белән уртаклашып. Физәниянең әнисе дә, гомер буе кияү һәм кызының ярдәмен күреп, ихтирамын тоеп яши.
Өйнең нурлы, табынның мул булуы — хуҗабикәдән, каралты-кураның тәртиптә, терлек-туарның булуы хуҗадан тора.
— Бакчабыз зур. Андагы бөтен авыр эшне Флүс аты белән башкара. Үгезләр үстерәбез, аларны да ул карый, — ди Физәния, җәмәгате белән горурланып.
Хуҗалыктагы ат белән үзләренең генә түгел, авылдашларының да бакчаларын сөрә, бәрәңгеләрен өя һәм казып бирә, тирес тә түгә Флүс. Зиратны тәртиптә тотуга өлеш кертә, авылдашларны соңгы юлга озатудан читтә калмый. Үзләреннән ерак түгел чишмәне карап торуны да җиренә җиткереп башкара. Мал суюда да авылдашларының уң кулы ул.
Флүс тә җәмәгате белән горурлануын яшерми:
— Физәния матурлык ярата. Йортыбыз тирәсе иртә яздан чәчәккә күмелә. Күңел җылысын биреп, җырлый-җырлый үстерә ул аларны. Мин белә-белгәннән бирле сәхнәдә булды, җыр-моң ярата. Ул — аш-су остасы, булдыклы хуҗабикә. Бик тырыш, һәрчак ачык йөзле, кунакчыл, кешелекле, ярдәмчел, — ди җәмәгатенә ягымлы караш ташлап.
Тормыш дилбегәсен кулында нык тотучы алтын куллы гаилә башлыгы Флүс һәм хатын-кызның бөтен асыл сыйфатларын үзенә туплаган хуҗабикә Физәниягә алтын, зөбәрҗәт, бриллиант туйларын да бәйрәм итәргә язсын.
Асия КОРБАНГАЛИЕВА.
