Актанышта “ХХI гасыр кулибиннары” олимпиадасы узган. Анда катнашучы укучыларның эшләнмәләренә сокланмый мөмкин түгел. Ниләр генә уйлап тапмый алар: кер киптергеч, бәрәңге утырткыч дисеңме? Барысы да көнкүрештә кирәкле әйберләр.
Мәсәлән, Теләкәй урта мәктәбенең IX сыйныф укучысы Айгиз Миннигулов печән җыйгыч ясаган. Егет үзе Иске Җияш авылыннан. Кечкенәдән техника белән кызыксына. Төрле эшләнмәләр уйлап таба. Аның квадроцикл, трицикл ясаганы да булган. Хәзер сораучыларга заказ белән мангаллар эшли. Ул бәйгедә печән җыйгыч тәкъдим иткән.
— Мәктәбебезнең участогы зур. Укытучыларга эш җитәрлек. Аларга без дә ярдәм итәргә тырышабыз. Кул эше җиңел түгел, шуңа уйлаштык та, остазым — технология укытучысы Рәмзил Әхмәтов белән печән җыйгыч ясадык, — дип сөйли Айгиз. Аны ясау катлаулы булмаган, фантазияне эшкә җигү һәм тырышлык кына таләп ителгән.
— Угольникка тишекләр тишеп, печән җыйгычның тешләрен беркеттек. Күтәреп төшерергә җайлы булсын дип, рычаглар көйләдек. Мотоблокны трицикл итеп үзгәрттек. Узган җәй печәнне тулысынча шул җайланма белән җыйдык. Ул безгә бик ошады. Эшебезне күпкә җиңеләйтте. Укытучымнан күп һөнәрләргә өйрәнәм. Рәхмәт аңа, — ди Айгиз. Киләчәктә әңгәмәдәшем уйлап табучы инженер булырга хыяллана.
Эльвира МОЗАФФАРОВА.
