Апаста яшәүче Равия һәм Абдулла Хафизовлар лаеклы ялга чыккач, кызыклы, файдалы шөгыльне үз иткән. Көннәр буе бакчада казына алар. Нинди генә яшелчә, җиләк-җимеш үстермиләр. Кура җиләгенең берничә төре, каен җиләге, бакча җиләге, виноград инде өлгергән. Кавын-карбызларны авыз иткәннәр.
Бакчада һәр әйбернең үз урыны бар. Тәҗрибәле агроном Абдулла абый бакчачылык серләрен яхшы белсә, төгәллек, пөхтәлек — озак еллар икътисад өлкәсендә хезмәт куйган Равия апаның тырышлыгы.
— Эшләгәндә бакчага вакыт калмый иде. Лаеклы ялга чыккач, вакыт үткәрергә бер шөгыль. Иртә яздан ук тәрәзә төбендә үсентеләр үстерәбез. Теплицага да чыгарабыз. Артыгын балаларга, туганнарга, дусларга бирәбез, — ди Равия апа.
Яшелчә төрләрен, сортларын Абдулла абый сайлый. Утыртыр алдыннан киңәшләшеп, уртак фикергә килеп, яңа яшелчәләрне дә сыныйлар. Өч ел теплицада да, ачык һавада да кавын һәм карбыз үстерәләр.
— Теплицада карбыз, кавыннарны элеп куймыйбыз. Җирдә тәгәрәп ятканда уңышны әйбәтрәк бирәләр. Тәмле, сусыл, иң мөһиме — үзебезнеке, ашламасыз, табигый юл белән үскән. Балалар, оныклар кайта, аларны сыйлавы рәхәт, — ди хуҗабикә.
Абдулла абый 10 еллап виноград үстерә. Бу кызыксыну күршесе биргән бер төп виноградтан башланган. Һәр елны ике-өч төп арттыра барган. Хәзер бакчада 15 төп төрле сортлар үсә. Тәрбияләргә, кисәргә, кыш өчен әзерләп калдырырга интернеттан өйрәнгән.
— Кирәкмәгән яфракларын, ботакларын кисеп, гел карап торам. “Изабелла”, “Изумруд” сортлары, җирле виноград, иртә һәм соң өлгерешле сортлар бар. Быел 5 төп “Кишмиш” утырттык. Уңышыннан сок ясыйбыз, таныш-белешкә бирәбез, — ди Абдулла абый.
Ләйлә ШИҺАБИЕВА.
