Балтач районының Югары Шубан авылында гомер кичерүче 43 яшьлек Булат Хәйруллин 16 июньдә бөтен Татарстанны шаккатырды. Ул Мамадыш районы Бөрсет авылы янәшәсендә
104 кг лы җәен тота. Тәрәзә кую белән шөгыльләнүче останың балык тоту серләре турында үзеннән белештем.
— Кечкенәдән инеш буеннан кайтып кергәнем юк, — дип елмая Булат абый. — Хәзер дә, вакыт чыкса, Кама, Идел буена ашкынам. Җомга көн өйләдән соң эләкте ул балык. Җәен өчен махсус кармак белән тоттым. Җим итеп эре суалчан куйган идем. Җәенне тартып чыгару өчен, ярты сәгать вакыт китте. Башта көймәгә бәйләп куйдым. Соңрак шул тирәдән узып барган көймәне туктатып, балыкны күтәреп салырга ярдәм итүләрен сорадым.
— Балыкны нишләттегез соң?
— Танышларыма өләштем, сатып та бирдем. Ышанасызмы, үземнең авыз иткәнем юк әле.
— Булат тормыш иптәше Дилә белән Кәрим һәм Әмирхан исемле ике егет үстерәләр. Балалары Казанда төрек лицеенда укый. Икесенең дә шахмат спорты буенча зур уңышлары бар, — ди Югары Шубан авыл җирлеге башлыгы Сәгурә Васильева. — Әниләре Сәгурә апа Шубан башлангыч мәктәбендә гомер буе укытучы булып эшләде. Яшьләр Сәгурә апаның сүзен тыңлап, аны бик хөрмәт итәләр. Булат балык тоту белән күптәннән кызыксына. Элек тә гел зур балыклар тота иде. Бу җәен Булат кадәр ике бит!
Руслан ХӨСНЕТДИНОВ.
