“МОНДЫЙ ЗУР ҖӘЕН ТОТКАНЫМ ЮК ИДЕ”

Питрәч районы Чыты авылында гомер итүче 69 яшьлек Мәхмүт абый Гәрәев Мишә елгасыннан 75 кг авырлыктагы җәен балыгы тоткан, аңа 26 яшь дип уйлана. Соңыннан балык итен авылдашлары белән бүлешкән. “12 яшьтән балыкка йөрим. Бу еллар дәвамында тонналап балык каптырганмындыр, әмма мондыйны беренче тапкыр эләктердем”, — диде ул.
Мәхмүт абый майдан октябрьгә кадәр һәркөнне балыкка йөри. Үзе балык бик ашамаса да, яраткан шөгыленнән баш тартасы килми икән.
— Җәен төнлә йөри, унбер белән бер арасында, — дип сөйләде ул. — Көндез сарык чалдым да, аның күкәен кармакка эләктереп суга аттым. Ул дүрт көн шулай ятты. Инде исләнә башлаган иде. Ә җәенгә шул сасы кирәк икән. Бишенче көнгә ул аны капкан. Төнге сәгать өчтә килеп карасам, нидер бар. Кармакны тартып булмый, авыр. Кайтып улымны уятып, кабат төштек. Икәүләп бер сәгать азаплангач, 2 метрлы җәен килеп чыкмасынмы! Шок булды. Машинага сыймый, көчкә урнаштырдык. Шуннан капка алдына алып кайтып суйдык. Аны икегә бүлеп үлчәдек. Башы гына 25 кг авырлыкта иде. Ул әле дә туңдыргычта ята. 5 августта бездә Авыл көне була, уха пешерербез дип уйлыйм. Җәен балыгы бик авыр була икән. Кечкенә генә кисәге дә 4-5 кг.
Эльмира СӘЛАХОВА.