Мамадыш районы Ишки авылыннан күңелле яңалык алдык — күптән түгел биредә чишмә ачу тантанасы узган. Халык телендә аны “Зират” чишмәсе дип йөртәләр икән.
— Бу чишмә авыл зиратыннан ерак түгел. Бәлки, атамасы шуңа бәйле куелгандыр, — дип сүз башлады Ишки авылында гомер итүче Мансур абый Шамбазов. — Чишмә авыл халкы өчен бик җайлы урында урнашкан. Элек, колонкалар куелмаган чорда, суны шуннан эчә идек. Әле хәзер дә, монысы бигрәк тәмле дип, чишмәгә йөрүчеләр күп. Суы йомшак, чәй өчен аеруча яхшы. Соңгы елларда ул ташландык хәлгә килгән иде. Авыл халкы акча җыешып, авыл җирлеге, мәчеткә йөрүче аксакаллар белән бергәләп, чишмәне төзекләндерделәр. Бик матур килеп чыкты. Әйләнә-тирәсен чәчәкләр бизәп тора. 12 августта халык тантаналы төстә ачылышын бәйрәм итте. Пылау пешерделәр, чәй кайнаттылар, догалар укыдылар. Чишмәбез тәмле суы белән озак еллар сөендереп торсын, гел шулай челтерәп аксын, дип телибез.
Лилия ЙОСЫПОВА.
