— Миңа 60 яшь тулып китте. Намазга яңа бастым. Элек укылмаган намазлар өчен тәүбә кылырга кирәк, диләр. Ничегрәк, нинди сүзләр белән тәүбә кылырга икән?
Галия, Башкортстанның Әлшәй районы.
Казанның “Гаилә” мәчете имам-хатыйбы Рөстәм хәзрәт ХӘЙРУЛЛИН:
— Тәүбәнең шартлары бар: гөнаһ кылудан туктау, гөнаһ эшләгәнгә чын күңелдән үкенү, Аллаһтан гафу сорау, бу гөнаһка бүтән кайтмау, әгәр кеше хакына кергәнсез икән, аңа бу хакны кайтару. Бу очракта фарыз гамәлләрне үтәмәгән кеше Раббыбыз өлешенә кергән булып чыга. Тәүбә шарты буенча бу өлешне кайтару мөһим. Шуңа да берәр дәфтәргә балигълык яшеннән алып (хатын-кызлар өчен күрем башланган чактан исәпләнә) намазга басканчыга кадәр укылмаган рәкәгатьләрне санап чыгарырга һәм фарыз намазларын акрынлап каза кылырга киңәш итәм. Сөннәт намаз каза кылынмый. Каза намазын ниятләгәндә, мәсәлән, иртәнге намазныкын: “Әй, Раббым, казага калган иртәнге ике рәкәгать фарыз намазын укырга ниятләдем”, — дип укырга кирәк. Вакытында кылмаган намазларыбыз өчен Аллаһы Тәгалә гафу итәр дип өметләнәбез.
Фото: © ildintorlak/123rf.com
