Гөлназ Зарипова бәйләгән уенчыкларны күргәч, үзеннән-үзе балачакка кайтып киләсең. Гөлназ аларның һәрберсенә күңел җылысын салып башкара. Үзе дә ике бала әнисе бит. Шулай булгач, сабыйларның нәрсә теләгәнен, күңелен күтәргәнен исәпкә алып, сихри бер дөньяга чума.
— Тумышым белән Тукай районыннан, хәзерге көндә Яшел Үзән районының Олы Яке авылында яшим, — дип сүз башлады әңгәмәдәшем. — Ирем Илнар белән ике ул тәрбиялибез. Олы улыбыз Нурисламга 5 яшь, төпчегебез Әмирханга 2 яшь тула. Әлегә бәби ялында утырам. Аңа кадәр Казанның 89 нчы мәктәбендә татар теле һәм әдәбияты укыттым. Олы улым белән декретта вакытта күптәнге хыялымны чынга ашырасы килеп, кулыма ыргак (крючок) алдым. Бу 2018 ел иде. Шуннан бирле бәйлим. Башта үзем, туганнарым, дусларым өчен генә бәйләсәм, хәзер күбрәк заказга эшлим. Уенчыкларны ыргак ярдәмендә җептән бәйлим. Кирәкле өлешенә синтепон тутырам, билгеле бер формага китерәм. Кайвакытта махсус күзләр кулланам. Бу эштә төп материал — җеп. Курчаклар, аларның киеме, чәче — барысы да җептән эшләнә. Башка материалларны сирәк файдаланам.
— Уенчыкларны, гадәттә, кемнәр сорый?
— Күбрәк заказга бәйлим. Уенчыклар белән балалар үзәгендә эшләүчеләр күбрәк кызыксына: төрле уеннар уйнаталар, билгеле бер материалны өйрәнгәндә, дәрестә файдаланалар. Уенчыкның төсе, зурлыгы, формасы — барысы да заказ бирүче белән килешенә. Уенчыкны бер көндә дә бәйли алам, кайчак берничә атнага сузыла. Күпләр кечкенә уенчыкны бәйләү җиңелрәк дип уйлый. Ләкин, киресенчә, мондый уенчыклар күп көч һәм сабырлык сорый. Быел татар егете белән татар кызын эшләгән идем. Шул курчакларны күреп, улымның балалар бакчасындагы тәрбиячеләр төрле милләт курчакларын бәйләп бирүемне үтенде. Бер айда 12 курчак эшләдем. Бу шәхси рекордым дисәм дә була. Киемнәрен, аларның бизәлешен, чәчләрен — барысын да үзем уйлап таптым. Моның өчен интернет челтәрендәге шактый белешмәне өйрәнергә туры килде.
— Яраткан шөгыль рәхәтлек белән бергә табыш та алып килергә тиеш…
— Хәзер тагын ике пар татар егете белән татар кызы бәйлим. Вакыт кына җитсен, заказларым бар. Вакыт ягы кысан булса, эшнең тәме бетә икән. Шуңа ашыгыч заказлар алырга тырышмыйм. Иркенләп, тәмен белеп эшләргә яратам. Андый чакта рухый як та, матди як та тигезләшә. Хәзер кул эшләре югары бәяләнә. Бервакытта да кыйммәт куймыйм. Бу — төп эшем түгел, кызыксынган юнәлешем генә. Киләчәктә уенчыкларым зуррак танылу алсын иде, дип хыялланам. Киләчәктә осталык дәресләре күрсәтә алырлык дәрәҗәгә үсеп җитәрмен дип ышанам.
Руслан ХӨСНЕТДИНОВ.
