Моннан бер ел элек Чаллының 79 нчы лицей-интернатының математика укытучысы Нәсим ШӘФЫЙКОВның ата-аналар җыелышында “Асылъяр” җырын башкарган видеосы бик популяр иде. Нәсим әфәнденең зур хыялы була — яшьлек кумиры Гөлнара Тимерҗанова белән дуэт башкару. “Шәһри Чаллы” газетасы редакциянең “Пятачок” дип аталган бәйрәм концертында укытучыны кумиры белән очраштыра. Шул кичәдән соң Нәсим әфәнде зур эстрадага аяк басты.
— Эстрада күгенә илткән йолдызлы юлым, дөрестән дә, “Пятачок”тан башланды. Шундый зур аудитория каршында чыгыш ясаганым юк иде. Гөлнараны, оештыручыларны кыен хәлгә калдырмасам иде, дип бераз борчылдым. Шөкер, бар да яхшы килеп чыкты, — дип искә ала беренче чыгышын мөгаллим-җырчы.
— Җырчы белән аралашканыгыз бар идеме?
— Аңа 18 ел элек концертта чәчәк бәйләме бүләк иткән идем, бергә фотога төштек. Шуннан соң очрашкан булмады. “Пятачок” концертында юлларыбыз кисеште.
— Гастрольләргә ничек йөри башладыгыз?
— Гөлнара: “Көзен Кама аръягында үтәчәк сольный концертларымда катнашасың килмиме?” — дип чакырды. Әлбәттә, бик теләп ризалаштым. Чөнки бездән ерак түгел. Концерттан соң кайтып йөрергә дә җайлы. Мәктәп тормышы бит билгеле бер тәртип буенча бара: дәфтәр, журнал, дәресләр дигәндәй… Ә монда башка дөнья. Яңа хис-кичерешләр, яңа танышулар, яңа заллар. Дистәләгән район-шәһәрләрдә булдым. Башкортстан якларын да шаулатып кайттык. Ахыргы концертыбыз
12 декабрьдә башкаланың “Пирамида” залында үтте.
— Мәктәп җитәкчелеге моны ничек кабул итте?
— Шелтәгә урын калдырмадым. Кичен сәхнәдә булсам, иртән, кизүдәге солдат кебек, такта янында басып тора идем. Төнге сәгать ике-өчләрдә кайткан чаклар да булды. Әмма эшемә зыян китермәдем. Мәктәпне ташлап китмәсә ярый инде, дип борчылучылар да булды.
— Аларга ни диярсез?
— Җыр ул — күңелне ял иттереп, илһамландырып ала, тормышка ямь өсти торган бер көч. Укытучы һөнәрен бернигә дә алыштырмаячакмын.
— Хәзер инде гастрольләрне сагынырсыз.
— Әйе, хәзергә җырлы-моңлы сәяхәтебез тәмам. Өч айга якын дәвам иткән турыбыз сизелми дә үтте. Бу чор тормышымда, һичшиксез, иң истәлекле хатирәләрнең берсе булып уелып калачак.
— Киләчәктә дә концертларда катнашырсызмы?
— Сәхнә ул тиз генә җибәрми, гел үзенә тартып тора. Киләчәктә үземә атап язылган яңа җырлар турында да хыялланам. Кеше җырын башкарып йөрисе килми.
— Нәсим, күпләрне кызыксындырган сорауны бирми кала алмыйм: сез дә ялгыз, Гөлнара да…
— Безне дуслык җепләре генә бәйли. Гөлнараны туганымдай, апамдай якын күрәм, хөрмәт итәм.
Илшат СОЛТАНОВ.
