Башкортстанның Баймак районыннан Газыйм Мөхәммәтҗанов күптән түгел мотоцикл белән Һиндстанга барды. Тиздән сәяхәтен дәвам итәргә тели. “Непал, Таиланд, Лаос, Камбоджа, бәлки, Малайзия якларына юл тотармын”, — ди. Шуңа мотоциклын да Делида калдырып кайткан.
— Студент чакта мотоцикл белән төрле илләргә сәяхәт итүчеләр турында кызыксынып укый идем. Мине башка халыкларның яшәү рәвеше, мәдәнияте, гореф-гадәте кызыксындыра. Үзем дә шулай сәяхәт итү теләге белән яна башладым. Ниһаять, былтыр бу хыялымны тормышка ашырырга насыйп булды. Июльдә Мурманскидан мотоцикл сатып алдым. Беренче тапкыр шуннан туган ягым Баймак районына кадәр мотоциклда кайттым. Аннары Мәскәүгә киттем, — дип искә ала Газыйм.
Хәзер әңгәмәдәшем башкалада яши. Аңа 26 яшь. Үзе укып чыккан Мәскәү политехника университетында эшли. 46 көн эчендә ул мотоциклы белән Грузия, Төркия, Әрмәнстан, Иран, Һиндстан, Пакыстан якларында булырга өлгергән. Сәфәрдә күргәннәре белән социаль челтәрдә таныштырып бара.
— Әлбәттә, ерак арага поезд, самолет белән бару җайлырак. Әмма мотоцикл дөньяны башкача күзалларга ярдәм итә. Күп кеше чит илгә ял итәргә курорт шәһәрләргә бара, ә мотоцикл белән илнең теләсә кайсы почмагын күрергә мөмкин, — ди Газыйм.
Ул ялгыз сәяхәт итә.
— Бу үземне танып белергә ярдәм итә. Сәяхәттә төрле илләрнең матур урыннары белән танышам. Әйтик, Ирандагы Марс планетасын хәтерләткән Ормуз утравы үзенчәлекле, — ди Газыйм.
Ике тапкыр сәяхәткә бару аңа 396 615 сумга төшкән. Мотоцикл белән сәяхәт итүчеләргә киңәшләрен дә бирде.
— Алдан план төзергә кирәк. Юлда ашыкмау, һәрчак сизгер булу сорала. Сәяхәткә җыенганда җирле халык телендә бер-ике сүз өйрәнсәң, сиңа хөрмәт бермәбер артачак. Гомумән, ишарәләр ярдәмендә дә аралашырга мөмкин. Бик кирәк булганда, телефон аша тәрҗемә ясарга мөмкин. Иң мөһиме — рухый яктан әзерлек. Юлда төрле хәлдә калуың бар, бөтенесенә дә әзер булырга кирәк, бигрәк тә кыш көне мотоциклда саклык сорала. Бу юлы 2535 метрлы кар көртләрен дә үтәргә туры килде, — дип сөйли Газыйм.
Аңа сәяхәтләрендә дә хәерле юллар телик.
Эльвира МОЗАФФАРОВА.
