Әлмәттә яшәүче Булат МОСКОВ 24 майда Казанга хәтле велосипедта килде. Ике ара — 265 чакрым. Булат аны 15 сәгатьтә үткән. Велосипедта башка шәһәрләргә 15 яшеннән йөри башлаган. Әлмәттән Чаллы, Мөслим, Зәйгә барган. Ул аралар хәзер спортчы егеткә аз тоела, күрәсең, башкалага хәтле үк юл тоткан.
— Уйламаганда оештым да чыгып киттем. Булдыра алырмынмы икән, дип үземне сынап карыйсым килде. Тиешле ноктага барып җитү авыр булмады. Хәлем бик яхшы иде, — дип сөйли Булат. — Иртәнге сәгать 4 тә уянып, җыенып, юлга кузгалдым. Кичке сәгать 6-7 ләр тирәсендә килеп җиттем. Узып китүчеләрнең реакциясе төрле булды. Кайберләре: “Сәер”, “Юләрдер бу…” — дигән сыманрак карады. Туктап, ярдәм кирәкмиме, дип сораучы машина йөртүчеләр дә булды. Юл уңаенда кибет, кафега кереп чыктым.
— Тизлек зур идеме?
— 70-75 км/сәг. Ә уртача тизлек — 20 км/сәг.
— Велосипедың текәме?
— Бик кыйммәтле түгел, 20 мең сум тора иде. Яхшырак көпчәкләр алып куйдым.
Көрәшче, велосипедчы Булатка 18 яшь тула. Башкортстанның Стәрлетамак шәһәрендә укый. Әлмәт районы өчен көрәшә. Тренеры — Рузил Ганиев. Булатның ирешкән уңышлары шактый: көрәш буенча Татарстан, Россия беренчелеге чемпионы. Билбау көрәше буенча да Татарстан чемпионы, Россия призеры һәм башка бик күп турнирлар җиңүчесе. Көрәшче егет хәзер бөтен көчен куеп тиздән булачак көрәш буенча Дөнья чемпионатына әзерләнә.
Лилия ЙОСЫПОВА.
