Мамадыш районы Югары Яке авылы Сабан туен уздырырга кайткач, чәй эчәргә Илсөяр (51 яшь) һәм Марсель (53 яшьтә) Гобәйдуллиннар йортына алып керделәр. Өй эчендәге унлап лимон агачында зур лимоннар, янәшәдә гранат та җимеш биреп утыруын күреп сокландым.
— Лимонны ун еллап үстерәм, үсентесен сыйныфташым биргән иде, — дип әйтте хуҗабикә Илсөяр апа. — Арада 900 грамм авырлыктагы лимоннар да бар. Ваграк лимон бирә торган агачлар да утырттым. Тик нишләптер алары куе яшел төстә. Лимоннарым ел әйләнәсе җимеш бирә. Чәчәк аталар, лимоннар үсә тора. Гадәттә, бер агачта егермеләп лимон була.
Илсөяр апа Казан-Чаллы юлының Сайкичү базарында 25 ел сату итә. Юлчыларны татар халык ашлары белән сыйлый.
— Шушы лимоннарымны чәйгә салам да, нинди тәмле чәй бу, арбуз салдыгызмы әллә, дип сорый юлчылар. Әлеге лимон чәйгә хуш ис бирә, — ди Илсөяр апа.
Хуҗабикәдән лимонны үстерү тәртибен сорашам. Су ярата торган агач икән ул. “Бер төпкә һәр көнне 1 литр су сибәбез”, — ди Илсөяр апа. Цитрус агачы өчен кибеттән сатып алган махсус ашлама, витаминнар да кулланалар. “Хәтта йомырка пешергән суны да гөл төбенә сибәм, кальций бит ул”, — дип елмайды хуҗабикә.
— Лимон агачы чәчәк атканда, ул урнашкан бүлмәдә йокларга тырышабыз. Беренчедән, исе (ясмин чәчәген хәтерләтә) күңелгә хуш килә, икенчедән, микробларны үтерә. Үсентеләрне ике кодагыема, улларыма да бирдем. Хәзер алар йортында да лимон үсә, — дип сөйләде Илсөяр апа. — Гранатка килгәндә, аның үсентесен төпчегем Булат 1 ел элек Казаннан алып кайтты. Инде җимешен татырга өлгердек. Ул бик зур түгел иде, тавык йомыркасы кадәр булып үсте. Кызыл төстә. Тәме нәкъ кибеттә сатылган гранатныкы кебек. Кабыгы калынрак була. Гранат елга ике тапкыр җимеш бирә. Шуның орлыгын алып, тагын гранат утырттым әле. Әлегә матур гына үсеп утыралар. Мәрхүм әтием Гаптелбарый яшелчә үстерергә оста иде. Күрәсең, аның сәләте миңа да күчкән.
Эльмира СӘЛАХОВА.
