Арча районының 12 яшьлек көрәшчесе Самир Ахунов өчен быелгы көрәш сезоны аеруча истә калыр, мөгаен. 12 июньдә Теләче районының Сауш авылында узган җыенда ул тәүге тәкәсен отты. 35 кг авырлыкта батыр калып, азактан тугыз чемпион арасында жирәбә юлы белән уйнатылып, ул нәкъ менә Самирга чыкты. Билетта “тәкә” дигән язуны күреп, бала шатлыгыннан мәйдан буйлап яшен тизлегендә йөгереп тә китте, килеп пьедесталга менеп басып, күңеле тулып, елап та җибәрде. Шундый ихлас, дулкынландыргыч мизгелләр иде ул.
— Тәкә оту турында хыялланган иде. Күп тапкыр I урында калып, лотереядә катнашып, беркайчан да бүләк чыкканы булмады. Аллаһы Тәгаләмә рәхмәт, улымны бөтен мәйдан каршында зурлаган, — дип сөйли Самирның әнисе Рәмзия Ахунова. — Ирем белән эштә идек, Саушка бара алмадык. Динияр Муратовка рәхмәт, улыбызны Сабантуйга ияртеп киткән. Әле бит тәкәне салып кайтырга машинасын да үзе тапкан. Арча районының Курса Почмак авылыннан килгән бер абый белән сөйләшкән. Кичке сәгать
7 дә Самир тәкә белән кайтып кермәсенме! Шаккаттык.
Тәкә отып кайтуга, икенче көнне тәүге телефонын — айфон сатып алган Самир. Әти-әнисе биргән түгел, ә үзе ел буе көрәшеп җыйган акчасына! Үзең эшләп тапкан аеруча кадерле бит ул.
— Ел буе көрәштән кайтып кермәде. Ярышларда кайларда гына булмады. Көрәшеп откан акчасын ел буе җыеп барды. Бер сумын да туздырмады. “Айфон алам”, — дип тырышты. Аның телефоны юк иде, — ди Рәмзия. — Күңеле булды инде. Әле Түбән Кама Сабан туена барып, 35 кг авырлыкта көрәшеп, I урын алып, 15 мең сумлык сертификат, ә Казанның Идел буе районындагы Сабан туенда чемпион булып, ноутбук отып кайтты. Өйдән озатып калганда, имгәнә күрмәсеннәр, дип ут йотып торабыз. Балалар җиңү белән шатланып кайтып кергәч, сөенечебезнең чиге юк.
Лилия ЙОСЫПОВА.
