Түбән Кама Сабан туенда 62 яшьлек Рәшит Вилданов егетләрнең борынына чиертте. Ул 7 минут эчендә 16 килограммлы герне 205 тапкыр күтәрә. Рәшит абый спорт ярышларында элек тә катнаша торган була. Әмма ике ел элек операция ясату сәбәпле, тәнәфес алган. Аның каравы быел үз рекордын тагын да яхшырткан. Батырга беренче урын өчен 5 мең сум күләмендә акчалата бүләк тапшырганнар. Рәшит абый белән күптәннән әңгәмә корасы килеп йөри иде. Ләкин кесә телефонына күпме генә шалтыратсам да, ул гел сүнгән була. Бер ай дәвамында көн саен шалтырата торгач, ниһаять, спортчының тавышын ишетә алдым.
Ләкин үзен язарга теләвемне әйткәч, Рәшит абый бераз шикләнеп калды. Берничә минуттан аның белән тиз уртак тел таптык.
— Тумышым белән изге Болгардан мин, — дип сүз башлады Рәшит абый. — Җәй көне ял вакытында хатыным белән шунда кайтабыз. Анда элемтә начаррак, шуңа миңа чыга алмагансыздыр. Мин хәрби кеше.
25 ел Үзбәкстанда хезмәт иттем. Хәзер Түбән Камада Советлар Союзы Герое Гани Сафиуллин исемендәге Татарстан кадетлар корпусында эшлим. Армия кул сугышы (армейский рукопашный бой) дәресләрен алып барам. Бездә Татарстаннан гына түгел, төрле төбәкләрдән укырга киләләр. Кадетлар белән ярышка кайларга гына бармыйбыз. Быел ике укучым “Россиянең спорт мастеры” исемен алды. Тагын 4 егет Россия чемпионы булып танылды. Хатыным бухгалтер, улым минем юлдан китте.
— Рәшит абый, быел гер күтәреп танылдыгыз?
— Бу хәл Түбән Кама Сабан туенда булды. 16 килограммлы герне 205 тапкыр күтәрдем. Моның өчен 10 минут вакыт бирелгән иде. Әмма 7 минуттан соң бармактагы сөял ачылып, каный башлады. 3 минут вакытым әрәм калды. Кулым канамаса, герне тагын да күбрәк күтәргән булыр идем.
— Мондый уңышка ирешү сере нидә?
— Дистә елдан артык һәр көнне кимендә 1 сәгать спорт белән шөгыльләнәм. Дөрес, файдалы ял да кирәк. Күптән түгел Болгарга экскурсиягә барып кайттык. Яңа уку елына җитәрлек көч-дәрман тупладым.
Киләчәктә Рәшит абый үзенең яңа рекордлары белән гаиләсен, укучыларын сөендерер дип ышанып калабыз. Максатчан кеше бервакытта да югалмый!
Арыслан ГӘРӘЕВ.
