Хайваннар телен аңлаучы Сөләйман пәйгамбәргә зарланып бер күгәрчен:
— Әй Сөләйман, хикмәтле патшабыз, сиңа бер соравым бар, җитди генә җавап бир әле. Мин инде кайчаннан бирле бер оядан икенчесенә күчеп йөрим, чөнки күченгән һәрбер оядан сасы ис килә. Шуннан һич котыла алмыйм, — дигән.
Сөләйман пәйгамбәр, елмаеп:
— Әй күгәрчен, оядан ояга күченеп йөрүнең бер хикмәте юк. Сәбәп ояда түгел, ә синең пычрак булуыңда. Ояда булган истән котылырга теләсәң, чисталыкны үзең сакларга тырышып кара әле, — дип нәсыйхәт бирә.
Чыннан да, ни гаҗәп, адәм балалары булган кимчелекләренең нигезен үзләреннән түгел, ә башкалардан эзлиләр. Бөтен дөньяны пычрак дип әйтә, әмма үзе чисталык сакламый. Бөтен кешене начар ди, тик үзе яхшы булу өчен бер адым да атламый.
Әгәр тирә-ягыңны үзгәртергә теләсәң, иң беренче эш итеп үзеңнән башла. Шул вакытта гына Аллаһы Тәгалә үзеңә дә яхшы якка үзгәрергә мөмкинлекләрен бирер.
Мәхмүт хәзрәт ШӘРӘФЕТДИНОВ вәгазеннән.
Фото: © pressmaster/123rf.com
