Чаллыда яшәүче Насих Каюмов өй шартларында лимон үстерә. Шушы көннәрдә цитрус агачы үзенең бай уңышы белән сөендергән. Аның авырлыгын белергә теләп, үлчәүгә куйгач, Каюмовлар үзләре дә таң кала. Бер лимон 1 килограмм 300 граммга кадәр үскән! Насих абый заводта эшли. Өенә көн саен лимоннарын сагынып кайта икән.
— 7-8 ел элек бертуган энем Ришатның хатыны Гөлназ безгә лимон үсентесе бүләк итте, — дип сүз башлады Насих абый. — Лимон — көйсезрәк җимеш агачы. Аны үстерү җиңел түгел. Күп кешедә ул авыр үсеп китә, яфрагын коеп интектерә. Заманында хатынымның әнисенә Башкортстанга да алып кайткан идек. Ләкин мантып китә алмады. Гадәттә, үзебез лимон уңышын елына ике тапкыр алабыз. Лимон җимеше өлгерсен өчен, якынча ярты елдан артык вакыт кирәк. Ул аеруча кояш, яктылык ярата. Шуңа да мөмкин кадәр лимон агачын якты бүлмәдә тотарга тырышабыз. Безнең лимон агачы чиләктә үсеп утыра. Чиләкнең төбен тишкәләдек тә сулы тазга урнаштырдык. Лимон үзенә кирәк кадәр суны шуннан ала. Әйтик, җәй көне бер көндә суны тулысынча эчеп бетерә ала.
— Насих абый, лимон агачы берьюлы ничә лимон өлгертте?
— Дүрт лимон өлгерде. Иң зуры — 1 килограмм 300 грамм. Икенчесе — 1 килограмм 129 грамм, өченчесе 902 грамм булды. Тагын берсе әле үсеп утыра. Лимонны вакытында өзмәсәң, эчендә мүк үсә башлый. Җимешләрне алганнан соң, ул матур итеп чәчәк ата, хуш исе бөтен фатирга тарала.
— Тәме ничек?
— Бик тәмле, кибетнеке белән чагыштырганда, бераз баллырак та. Чәйне үзебезнең лимон белән генә эчәбез. Хатыным Альбина ашханәдә эшли. Хезмәттәшләрен дә сыйларга өлгерде инде. Ни генә дисәң дә, үзең кадерләп үстергән җимеш агачының уңышы тәмле була шул.
Арыслан ГӘРӘЕВ.
