Иртәрәк өлгертергә дип, кыярны өйдән үстереп чыгарырга тырышам, нигәдер озак тернәкләнеп китә алмый. Сәбәбе нәрсәдә икән? Помидор үсентеләре бик матур үсә.
Җәмилә, Сарман районы.
Танылган бакчачы Франс ХӘЛИЛОВ:
— Җәмилә, кабаксыман культураларны (карбыз, кавын, кыяр) үсенте аша үстергәндә, өч төп таләпне үтәргә кирәк. Беренчедән, алар рассада вакытында башка культураларга караганда яктылыкка таләпчәнрәк. Икенчедән, күчергәндә тамыр системасын зарарламаска тырышыгыз. Әгәр тамырларына аз гына зыян килсә дә, аны шул ук көнне орлыктан бакчага утырткан үсенте узып китәчәк.
Үсентене тамырларын зарарламыйча күчерү өчен, аска таба очлаебрак торган стаканнарга утыртырга кирәк. Яки торфлы-черемәле стаканнарга утыртыгыз, аларны җиргә савыты белән утыртырга була. Стакан җирдә таркала, ашламага әверелә.
Өченче таләп: күчерелә торган үсенте 15-25 көннән дә зуррак булмаска тиеш.
Бакчага күчереп утыртканда, тамырларны бераз киптерсәң, үсентеләр стаканнан бик җиңел чыга.
Фото: © jackf/123rf.com
