Мисвәк — тешне чистарта, аннан ризык калдыкларын ала, куныкны (налет — ред.) төшерә торган махсус таякчык. Пәйгамбәребез Мөхәммәд салләллаһу галәйһи вә сәлләм: “Мисвәк — авыз куышлыгының пакьлеге һәм Аллаһы Тәгаләнең ризалыгы”, — дип әйткән. Рәсүлуллаһ вакытында бер агачның ботаклары теш пастасы һәм щеткасы сыйфатында кулланыла торган була.
Мисвәк озынлыгы белән гадәти теш щеткасын хәтерләтә. Хуш ис бөркелеп торган, тешне чистартканда согы бүленеп чыккан бу таякчык хакында хәдисләрдә телгә алына. Мисвәкнең файдасы фәнни яктан исбатланды. Мисвәк таякчыгы ясала торган агач согының химик составы триклозан, хлоргексидин кебек антибактериаль матдәләрнеке белән охшаш. Моннан тыш мисвәктә фтор, С витамины, танин, алкалоидлар һәм флавоноидлар бар. Шуңа да мисвәк куллану тешләрне ныгыта, тешләрнең чери башлавын булдырмый калуда булыша, теш сызлавын баса, авыз куышлыгындагы начар исне бетерә, уртларны ныгыта, шулай ук тешләрне агарта. Мисвәктән ясалган теш пасталары да кулланыла.
Пәйгамбәребез Мөхәммәд салләллаһу галәйһи вә сәлләм мисвәкне тәһарәт алыр, намаз укыр алдыннан кулланган, чөнки Рәсүлебез чисталыкка зур игътибар биргән.
Айсылу ЮЛДАШЕВА.
Фото: 
mukhina/123rf.com
