Камыр өчен: 2 йомырка, 3-4 стакан он, 2 аш кашыгы үсемлек мае, ярты стакан су.
Эчлек өчен: 1 кг сыер яки сарык ите, 1 кг бәрәңге, 2 суган, чама белән тоз, борыч, каз мае (булган очракта).
— Итне пешерергә салам. Бәрәңгене аерым пешерәм. Ул арада камыр басам. Җәймәнең калынлыгы токмачныкыннан калынрак булырга тиеш. Бер җәймәне шакмаклап кисәм, икенчесен түгәрәк килеш калдырам. Аларны аерым кәстрүлдә кайнап торган суга салып пешерәм. Ул суга каз мае да салам. Кайбер кеше җәймәләрне ит шулпасында пешерә. Каз мае салынган шулпага башта җәймәнең зурысын, аннан киселгәнен салам. Камыр 3-5 минут пешә. Бу вакытта бер кәстрүлдә ит, икенчесендә бәрәңге пешеп чыга. Түгәрәк җәймәне матурлык өчен тәлинкә төбенә салып калдырам. Шуннан түгәрәк җәймә өстенә ит, бәрәңге салам, тәменчә борыч сибәм. Өстенә шакмаклап киселгән камырларны тезәм. Шулпа өстәп җибәрәм. Бишбармак пешерүнең берничә сере бар. Беренчедән, аңа майлы ит кирәк, шулчак шулпасы тәмле була. Бу ризык татарга да, башкортка да казахлардан кергән. Ә алар майлы ит ярата һәм нигездә сарык ите ашый. Бишбармакны туган ягым Башкортстанда сарык итеннән пешерәләр. Мин исә сыер ите дә кулланам.
Руфия РӘХМӘТУЛЛИНА.
