Ленур БИКТИМЕРОВ, алып баручы, җырчы:
— Күптән түгел Батырлык ордены тапшырдылар. Сәламәтлек яхшы, Аллага шөкер. Соңгы арада мәшәкатьләр дә шактый булды. Госпитальләрдә ятканнан соң, “комиссовать” иттеләр (Ленур узган ел махсус хәрби операциядән яраланып кайтты — Л.Й.). Нәрсә генә булса да, иҗаттан туктамадым. Җырлар туплыйм. Халык белән араны өзмәдем, үземдәге проблеманы чыгармаска тырыштым. Хәзер ныклап чакырулар ала башладым. Ноябрьдән үз концертларым белән чыгарга җыенам. Залда ун кеше булса да куячакмын. Авылыбыз уртасында текә тау бар. “Исән-сау кайтсам, шунда агач утыртам”, — дигән идем. Көзен 9 мең агач утырттым. 8 мартта авылда бушка концерт куярга җыенам. Шундый вәгъдәм бар иде.
