Балык Бистәсендә яшәүче 16 яшьлек Адель Шәкүров Кытайдан 40 мең сумга панда костюмы кайтартып, кечкенә генә бизнес ачып җибәргән. Мәктәптә укуыннан бушаган арада аниматор булып, райондашларының күңелен күреп йөри икән. Яшь эшмәкәр якын киләчәктә бизнесын тагын да киңәйтергә уйлый.
Тырыш гаилә Шәкүровлар турында язганыбыз бар инде. Абзар тутырып мал асрап, ит һәм сөт ризыклары җитештереп сата алар. Әнисе Алсу заказга камыр ашлары пешерә. Гаиләнең даими клиентлары бар. Соңгы елларда әтисе Миннәхмәт абый арбага көйләнгән мич сатып алган, шуның белән төрле бәйрәмнәргә йөриләр. Әнисе кунакларны самавырда чәй кайнатып, тәмле коймак пешереп сыйлый. Мич коймагы хәзер тансык, сатып алучылар күп була икән.
Улларының аниматорлык эшен әти-әнисе дә хуплый, һәрвакыт ярдәм итәләр.
2 метр 60 см биеклектәге панда костюмын машинага салып, кирәкле урынга йә берсе, йә икенчесе алып бара икән. Ә Адель аю киемендә кунакларның күңелен күрә: шарлар бүләк итә, матур көйгә биеп күрсәтә. Чыгышыннан соң чакыручы килешенгән бәяне түли. Физик мөмкинлекләре чикле кешеләргә ташлама да каралган.
Панда киемен сатып алу өчен улына әтисе акча бирә. Тик бер шарт белән: “Акча эшләп карарга теләвең яхшы, ләкин укуың беренче урында булачак!” — ди Миннәхмәт абый. Адель, әлбәттә, берсүзсез риза була. Интернеттан бизнес башлап җибәргәндә нинди адымнар ясарга кирәклеге турында укый, өйрәнә. Танылган блогерлар белән бартер ясый, социаль челтәрләрдәге төркемнәргә реклама бирә, үзе сыман аниматорлар белән аралашып, хезмәтенә бәя билгели. Азмы-күпме эшкуарлык эшендә кайнаган кеше буларак, әтисе дә бизнес нечкәлекләрен аңлата.
Ә йомшак аю күпләрнең күңелен җәлеп итә, районда бик тиз популярлаша. Олысы-кечесе туган көн һәм башка бәйрәмнәргә чакыра. Адель керем-чыгымнарын язып бара торган дәфтәр һәм социаль челтәрдә аниматорлык хезмәтенә багышланган сәхифә булдыра. 15 мең сумга чыбыксыз музыка колонкасы да сатып ала.
— Яңа ел чоры аеруча кызу булды, — ди ул.
Район үзәге белән генә чикләнми Адель, эше җәелеп киткәч, авылларга, хәтта Казанга да бара башлый. Әти-әнисе дә канатланып эшләгән улларының шөгыленә җитди карый, үз эшләрен җайлап, аниматорны заказлары буенча йөртә.
Күптән түгел Адель Балык Бистәсе районы Корноухово авылындагы картлар йортында да була. Башта җитәкчесенә шалтыратып, өлкәннәрне сөендерергә теләвен белдерә. Аны 8 март уңаеннан оештырыласы бәйрәмгә чакыралар. Адель белән әнисе лалә чәчәкләре алып, картлар йортына юнәлә. Йомшак аю бәйрәмдә катнашып, өлкәннәргә күтәренке кәеф бүләк итә.
— Панданы күреп, әби-бабайлар бик гаҗәпләнде. Кочаклашып фотоларга төштек. Аларның шатлыклы йөзләрен күреп сөендем. Киләчәктә картлар йортына ярдәм итәсем килә, — ди Адель. Балалар йортына барып, нәниләргә дә күңелле бәйрәм оештырырга тели икән. Бу ниятен дә киләчәктә тормышка ашырыр. Чөнки әйткән сүзен аяк астына салып таптый торган егеткә охшамаган. Өлкәннәрчә фикер йөртүе белән таң калдыра.
Адель IX сыйныфта укый. Имтиханнарны уңышлы тапшырып, укуын Казанда дәвам итмәкче. Планнары зурдан: башта — юрист, аннары икътисадчы белгечлеген үзләштерергә уйлый. Уку белән эшмәкәрлекне бергә үреп алып бармакчы.
Ноябрь азагында сатып алган панда киеме үз-үзен күптән аклаган. Тиздән тагын бер костюмга заказ бирергә уйлый Адель. Монысы аюныкыннан 3 тапкыр кыйммәтрәк икән. Нинди кием алуын әлегә сер итеп саклый.
Гаиләдә өченче бала ул. Апасы һәм абыйсы бар. Алар да тормышта үз юлларын тапкан. Төпчек булса да, иркә бала түгел Адель, кечкенәдән кул арасына кереп, эш рәтен белеп үскән. Йорт тирәсендә дә, маллар карашу буенча да әтисенең уң кулы ул. Вакыты булганда, ашарга әзерләргә дә ярата икән. Әнисеннән күреп, хәтта өчпочмак һәм сумса да пешерергә өйрәнгән.
Әңгәмәбез барышында Адельнең үткен, тәвәккәл, итагатьле егет булуына игътибар иттем. Яшь кенә булса да, олыны олы, кечене кече итә белә. Кырыс тормыш кануннары саф күңелен керләндермәсен, киләчәккә корган уй-теләкләре чынга ашсын иде!
Сиринә ГАРИПОВА, Балык Бистәсе.
