Фәрит абый Инсапов Башкортстанның Бишбүләк районы Кыңгыр-Мәнәвез авылыннан. Кечкенәдән агач эше белән шөгыльләнә. Куллары алтын аның. Ул салган өй, мунча, гаражлар бихисап. Балта остасы бирнә сандыклары да ясый.
Хәзерге заманда киленнәр бирнә сандыгы белән төшми бит, диючеләр дә табылыр.
— Сандык сорап килүчеләр күп. Аларны, милли йолаларыбызны саклап калу максатыннан, символ буларак кулланучылар да бар. 3 кызыбызны, 1 оныгыбызны да сандык белән кияүгә бирдек. Фәрит аларга да сандык ясады. Уртанчы кызыбызның туен чын татар йолалары буенча, су юллары күрсәтеп, җыр-бию белән үткәрдек, — ди Фәрит абыйның тормыш иптәше Әлфия ханым.
Үзен хәтерләгәннән бирле агачтан эшләнмәләр ясый Фәрит абый. Алтынчы сыйныфта укыганда беренче тапкыр шкаф ясаган ул. Һөнәре буенча да балта остасы, армиядә дә столяр булган.
— Йорт җиһазлары, беседка, тәрәзә йөзлекләре ясыйм. Үз остаханәм бар. Күбрәк юкә агачын кулланам, чөнки ул җиңел киселә, сырлап бизәкләр дә төшереп була, — ди оста.
Кышын, бушрак вакытта күңеленә якын булган эшенә чума ул. Елына якынча
5 сандык ясый. Бер сандыкны эшләү өчен бер атна чамасы вакыты китә икән. Сандыкларны якыннарының, туганнарының юбилейларына да бүләк итәләр.
Фәрит абый белән Әлфия апа 33 ел бергә. Алар 6 бала тәрбияләп үстергән. Әлфия ханым да, 66 яшендә булуына карамастан, һаман хезмәттә. 12-13 яшеннән сәхнәдә ул. Хәзерге көндә клубта режиссер булып эшли. Фәрит абый белән бер-берсен тулыландырып, илһамландырып яшиләр.
Альмира МӘҮЛЕТОВА.
