Зәйдә яшәүче Марс Сәнҗәпов борынгыдан килгән агач осталарының эшен дәвам итә.
Аз сүзле, тыйнак, эш сөючән агач остасы хакында язма әзерләр өчен байтак үгетләргә туры килде. Ул тумышы белән Чүпрәле районының Шланга авылыннан. Гаиләдә өч бала үсә, ул — төпчеге.
— Һөнәрем буенча мин машина йөртүче. Шулай булса да, кечкенәдән кулымнан агач, агач уеп ясый торган инструментлар төшмәде, — дип сөйли әңгәмәдәшем. — Авылның ир-егетләре агач эшенә оста бездә. Әтием Фәйзулла авылда, шулай ук тирә-якта күп өйләр салган, бизәгән, агачтан көнкүреш кирәк-яраклары ясаган кеше. Әлеге һөнәре белән гаиләбезне тәэмин итәрлек акча таба иде. Оста куллы кешенең өстәмә кереме булып тора бит.
Марс кайда гына яшәсә дә, аның оста куллы икәнен тиз сизеп алалар. Төп эшеннән кала һәрвакыт агач эшен дә алып барырга күнеккән ул. Бүген көнкүреш кирәк-яракларыннан тыш баскычларга кадәр ясый.
— Заказлар бервакытта да өзелеп тормый, кем әйтмешли, “сарафан радиосы” яхшы эшли, — ди оста. — Баштарак бригада белән дә эшләдем. Өйләрнең агач эшләрен, мунча, беседкалар ясадык. Соңгы вакытта үзем генә башкара торган хезмәткә алынам. Үзең ясаган эшкә үзең генә җаваплы буласың. Нигездә, агачтан баскычлар ясау белән шөгыльләнәм. Бу эш миңа рәхәтлек бирә, аннан ләззәт алып эшлим дисәм дә ялгыш булмас.
Агачтан әйбер ясау өчен материалны дөрес итеп сайлый белергә кирәк. Оста аларны Казаннан һәм Чаллыдан кайтарта.
— Агач баскычлар өчен иң яхшысы — корычагач (ясень), имән, бүк агачы, шулай ук бераз “эконом” вариант — ылыслы агачлар, ягъни нарат, чыршы, — ди Марс. — Нинди генә агачка тотынсам да, күңел биреп эшлим. Әлеге хезмәт башкалар күңеленә дә хуш килергә, озак еллар хезмәт итәргә тиеш.
Кулы эш белгән кеше яраткан һөнәреннән керем дә ала. Марс сүзләренчә, халык хәзер табигый әйберләргә күбрәк игътибар бирә, шуңа күрә аннан керем начар була алмый.
— Бүлмәгә агачтан ясалган кечкенә генә әйбер кертеп куйсаң да, исе бөтен өйгә тарала. Агач исен бик яратам, — дип сөйли оста. — Бер баскычны дүрт-биш көндә ясарга була. Мәсәлән, өч этажга ике баскыч туры килә, якынча ул 120-130 мең сумга чыга. Агачына, ясау элементларына карап, бәя үзгәрә. Шундый баскычларны аена дүрт-бишне ясаганым бар. Күбрәк Зәй, Әлмәт, Чаллы һәм Түбән Камада эшлим. Ульяновск, Лениногорск, Баулы, Алабуга шәһәрләрендә дә мин ясаган баскычлар бар.
Яз, җәй һәм көз айларында останың эше иң күп чор. Ә менә кышын эш бераз кими. Ул вакытта агач остасы куна тактасы, уклау, көрәк-сәнәк саплары, агач савытлар, кисмәкләр һәм башка шундый көнкүреш әйберләре ясау белән мәшгуль.
Агач эшләреннән арынып торган арада Марс еш кына кулына гармунын ала. Егет кешегә җитмеш төрле һөнәр дә аз дигән сүзләр дөреслеккә туры килә.
Индира СӘЙФУЛЛИНА.
