Теләче районы Баландыш авылының табигате бик матур, чишмәләргә дә бай ул яклар. Һәркайсы матур итеп эшләнгән, төзекләндерелгән, суын кулланалар. Бүген “Гөлчирә” чишмәсе белән якыннан таныштырырга булдык. Аның тирәсенә миләш агачлары, чәчәкләр утыртылган. Чишмәгә кадәр күпер ясалган.
“Гөлчирә” чишмәсе 2017 елда яңартылып эшләнгән. Авыл халкы бәйрәм оештырган. Ул чорда Баландыш җирлеге башлыгы вазыйфасын Рәшит абый Йосыпов башкара. Әлеге чишмә авылның тырыш егетләре, фермерлар, бертуган Рөстәм һәм Самат Мөхәммәтшиннар иганәчелеге белән сафка бастырыла. Хәзер исә Рөстәм Мөхәммәтшин үзе авыл җирлеге башлыгы вазыйфасын башкара.
— “Гөлчирә” чишмәсе авыл эчендә челтерәп ага. 620 метр торба ярдәмендә юл кырыена ук китерелде. Урыны җайлы булганга, туктап су алып китүчеләр күп, — дип сөйләделәр Баландыш авыл җирлегеннән. — Су чыганагына исем Мөхәммәтшиннарның әнисе Гөлчирә апа хөрмәтенә бирелде. Гөлчирә апа күптән бакыйлыкта, Рөстәм абый туып, берничә ай үтүгә, вафат була ул. Балаларының тырышлыгына, авыл өчен башкарган изге эшләренә рухы шат булып ятадыр. Чишмәне карау, тирә-ягын чистартуны авыл җирлеге дә, Рөстәм абый шәхсән үзе һәм гаиләсе гел контрольдә тота. Ул — чисталык, бөтен җирдә тәртип ярата торган кеше. Башка чишмәләрне дә, гомумән, авыл территориясен кайгыртып, карап тора. Изге эшләр башкарган ир-егетләребезгә авыл халкы бик рәхмәтле. Аларның бу гамәле башкаларга да үрнәк булды. Чишмәләребез озак еллар тәмле суы белән сөендереп торсын иде.
Лилия ЙОСЫПОВА.
