Теләче районы Баландыш авылының чишмәләргә бай булуы, аларның даими төзекләндерелеп, яңартылып торуы турында язган идек. Бүген бу авылның тагын бер матур су чыганагы — “Данияс-Ильяс” чишмәсе белән таныштырабыз.
— Әлеге чишмә башта кое формасында, түбә астына кертеп ясалган иде. Аннан соң авылның Карл Маркс урамы егетләре тагын да матурладылар: самавыр эшләделәр, зур будка ясап куйдылар. 20-25 кеше сыярлык беседка булды. Хәзер биредә сыйныфташлар очрашуы һәм башка чаралар уздыралар. Җәй айларында аеруча матур, — дип сөйли Баландыш авыл җирлеге башлыгы Рөстәм Мөхәммәтшин. — Территорияне корыган агач, чүп-чардан чистарттылар. Чишмәне казып, торбалар аша ярның икенче ягына чыгардылар. Беренчеләрдән булып төзекләндерү эшенә Данияс Гайнетдинов һәм Ильяс Мөбарәкшин алынды. Алар — күршеләр. Чишмә исеме шушы егетләр белән бәйле. Шулай ук Хашыйм Мөбарәкшин, бертуган Айдар һәм Айрат Гасыймовлар гаиләләре белән зур тырышлык күрсәтте. Хашыйм өендәге теләсә нинди әйберне бирергә мөмкин. “Барамы, ярыймы, Рөстәм абый?” — дип кенә сорый. Урамнары белән бергә чәчәкләр утырттылар, суын сибәләр. Бик булышалар. Авылыбызның хөрмәткә лаеклы карты — 97 яшьлек Әхәт абый Гайнетдиновны аерым әйтеп узасым килә. Чишмә тирәсендәге үләнне чаба, тәртип саклый. Ул — Даниясның әтисе. Энеләре Данил Гайнетдинов Казанда эшләсә дә, авылга еш кайта, су буен гел җыештырып йөри. Узган ел агачлар утырттылар. Аларны Айдар Гасыймов төяттереп алып кайтартты, утыртышып та калдырды. Авыл өчен җан атып йөри. Паркларга да агачлар алып кайтты. Авылга материалдыр, тегесен-монысын төяп кайтара башласаң, йөк машинасының бәясе дә арзан түгел. Алга таба егетләрнең тагын бер чишмәне матурлау хыялы бар. Акча да сорамыйлар. Хәзер күпләр бушка кыл да селкетми бит. “Афәрин!” диясе генә килә. Шашлык пешереп алабыз да шунда төрле план корабыз. Такта эше булсынмы, эретеп-ябыштырумы — барысы да кулларыннан килә. Урамнары белән ял да итә беләләр. Баландыш җирлегендә чишмәләр төзекләндерүне матур бер гадәткә керттек. Шулай бергә дус-тату булып, авыл өчен дип яшәргә язсын!
Лилия ЙОСЫПОВА.
20-25 кешелек беседка 
Чишмә элек шундый булган 
