Равил МӨХӘММӘДИЕВ, Азнакай районы Тымытык авылы:
— Хәзер элекке кебек тулы бакча бәрәңге утыртмыйлар инде. Үзебез дә 10 сутыйга гына калдырдык. Шул бәрәңге балаларга, кода-кодагыйларга да җитә.
Бәрәңге утырта торган трактор ясадым. Унбиш еллап инде көрәккә кагылган юк. Элекке чех тракторы — “TZ-4K-14”не яңадан үзгәртеп җыйдым. Хәзер шуның белән икенче икмәкне утыртам да, төбенә дә өям. Көзен исә сабагын чабам һәм алам. Трактор бәрәңгенең сабагын бик ваклап җиргә сиптереп бара. Гадәттә, бу эшне бәрәңге алганчы бер атна алдан эшлим. Сабак кибеп, җирдә черемә булып кала. Трактор белән алган бәрәңгене чүпләве бик җиңел: ул аның туфрагын коеп, җиргә чәчеп бара.
“TZ-4K-14” тракторын 1993 елда алган идек. Ул чакта әти белән колхозда эшләдек. Хәтерлим, 29 мең сумга төште ул. Заманасына күрә бик яхшы техника иде, хәзерге мотоблоклар кебек. Ләкин ул күпкә яхшырак, чөнки аны күтәреп йөрергә кирәк түгел. Хуҗалыкта нык булышты безгә. Хәзергәчә сафта! Дөрес, алты ел элек моторын алмаштырдык. Күрше егете Фәрит техниканы яхшы белә, аның белән эшлибез. Мондый трактор җыюның зур авырлыгы юк, интернетта хәзер барысына да өйрәтәләр. Озак еллар эретеп ябыштыручы булып хезмәт куйдым, шуның өчен тракторга кирәкле детальләрне ясау проблема булмады.
Трактор белән туганнарга, авылдашларга да бәрәңге утыртам. Инде әйтә башладылар. Бездә кайберәүләр бәрәңгене апрель азагында ук утырта. Без исә ел саен майның унбишләрендә генә чыгабыз. Ашыгуның мәгънәсен күрмим. Тымытык авылы Ык буенда урнашкан, җир уңдырышлы. Нинди коры 2010 елда да бәрәңге уңышы әйбәт булды.
Руфия РӘХМӘТУЛЛИНА.
