Балык Бистәсе районы Яңа Ырга авылыннан Фирзия Шаһитова — һөнәре буенча укытучы. Бүген гаиләсе белән Казанда яши. Мәликә белән Мәдинә исемле игезәк балалар үстерәләр. Тик 9 яшьлек кызлар икесе дә тууга мөстәкыйль рәвештә сулый алмый, берничә тапкыр реанимациядә ятарга туры килә аларга.
— Кызларыбыз 2015 елның 14 декабрендә Казанда туды. Мәликә — 940, ә Мәдинә 1110 г авырлыкта иде. Табиблар аларның хәлен Апгар шкаласы буенча 4-5 балл белән бәяләде. Тууга, ике кызыбызны да реанимациягә салдылар һәм ясалма сулыш алу аппаратына тоташтырдылар. 3 көннән ДРКБның реанимациясенә күчерделәр, — дип башлады сүзен Фирзия.
Биредә 1 ай ятканнан соң, хәле бераз яхшырган Мәдинәне яңа туган сабыйлар патологиясе (ОПН) бүлегенә күчерәләр. Мәликә бу вакытта реанимациядә кала.
— Мәликәбезнең хәле төрлечә була иде, авыраеп киткән вакытлары да күп булды. Кызларның хәле начарланып, икесе дә берничә тапкыр реанимациягә эләкте. Ирем белән каенанам һәрвакыт ярдәм итеп торды. Мәдинә 1 ел да 2 ай реанимациядә булганнан соң, февральдә кислородлы концентратор аппараты белән өйгә алып кайттык, — ди әңгәмәдәшем.
Өйдә Мәдинә 6 ай кислород аппараты белән сулый, аннан соң үзе мөстәкыйль рәвештә сулыш ала башлый. Шуннан соң алар социаль яклау бүлеге аша бушлай “Солнечный” тернәкләндерү үзәгенә, түләүле остеопатка, гомеопатка һәм дефектологка йөри башлыйлар, өйдә түләүле массаж алалар. Аларның тырышуы бушка китми, 2 яшь тә 9 айда Мәдинә йөреп китә.
— Мәликәбез 5 ел ДРКБның 1 нче реанимациясендә ятты. Кызыбызның авыр көннәре бик күп булды.
3 тапкыр “Йәсин” сүрәсе генә укыттык, исемен алыштырып карадык. Ул вакытта безгә ничек авыр булганын Аллаһы Тәгалә һәм үзебез генә беләбез. Хастаханәнең ишегалдында Аллаһы Тәгаләдән ялварып: “Баламны үз кулларыма бир, кеше кулларында тилмертмә”, — дип сораганнарым бүгенгедәй хәтеремдә. Аллаһы Тәгалә, табиблар һәм шәфкать туташлары ярдәме белән менә 4 ел без өйдә. Русфонд аша аппарат алып, кызыбыз Мәликәне ике аппарат белән өйгә алып кайттык, — ди Фирзия, шул вакытта кичергән хисләре белән уртаклашып.
Мәликәгә өйдә дә 3 ел 5 ай аппарат ядәмгә килә, ярты ел элек кенә үзе мөстәкыйль сулыш ала башлаган. Суык тиеп авырый башласа да, аппаратка тоташтыралар. Мәдинә исә үз аякларында йөри, тик теле генә ачылмый икән. Мәликә белән, әлбәттә, авыррак, ул тотынып кына йөри ала, сөйләшми. Ике колагы да ишетмәү сәбәпле, операция кирәк. Алар белгечләр белән өйдә шөгыльләнә. Берөзлексез түләүле массажлар, ЛФК, остеопатка йөрүләр, дефектолог белән шөгыльләнүләр… Чыдаган әти-әнигә, балаларга рәхмәт! Шулкадәр тырышлыклардан соң Аллаһ шифасын бирсен дип телисе кала.
— Җәйгә икесен дә бассейнга йөртергә исәплибез. Бу авырлыкларны үзебез генә ерып чыга алмаган булыр идек. Иң беренче ярдәмчебез ул — Раббыбыз. Шулай ук иремнең әниләренә (Фирзиянең әти-әнисе 15 ел элек вафат булган — А.М.), туганнарга, дусларга, изге күңелле кешеләргә Аллаһның рәхмәтләре яусын, — ди Фирзия Шаһитова.
Альмира МӘҮЛЕТОВА.
Мәдинә белән Мәликәгә ярдәм итәргә теләүчеләр өчен әниләре Фирзия Шаһитованың телефон номеры: 8-917-268-22-28 (“Сбербанк”, “ВТБ”, “Ак Барс” карталарына беркетелгән).
