Кәрим Тинчурин исемендәге Татар дәүләт драма һәм комедия театрында күптән түгел «Алтын алма» дип исемләнгән үзенчәлекле премьера тәкъдим иттеләр. Бу әкиятне 30 ел элек Шамил Фәрхетдинов Казан театр училищесы студентлары өчен диплом спектакле итеп махсус заказ белән язган булган. Хәзер ул студентларның күбесе Тинчуринның танылган артистлары. Бу юлы исә әсәрне театр каршында эшләп килүче «Могҗиза» театр студиясендә шөгыльләнүче физик яктан мөмкинлеге чикле балалар куйды. Режиссерлары — Салават Хәбибуллин. Куелыш җитәкчесе — Россиянең атказанган, Татарстанның халык артисты Зөфәр Харисов. Сәхнә теленә балаларны Татарстанның атказанган артисты Гөлназ Нәүмәтова өйрәткән. Спектакль «Во благо вместе» хәйрия фонды ярдәме белән куела. Уртак хезмәт нәтиҗәсендә туган «Алтын алма» әкияте тугрылык, ярдәмләшү, дуслык хакында.
«Могҗиза» театр студиясе 2019 елдан бирле эшләп килә. Баштарак биредә 7 бала шөгыльләнсә, хәзер алар 20 гә җиткән. Студиягә Татарстанның төрле районнарыннан киләләр. Әйтик, «Алтын алма»да төп геройларның берсе әкиятче Айрат Якупов — Теләчедән. Тазбаш ролендәге Илшат Сәмигуллин Балык Бистәсеннән. Әкияттә барлыгы 15 ләп бала, әти-әниләр дә катнашты. Спектакльне караганнан соң кеше өчен бернинди дә чикләр юк икәнен аңлыйсың. Гөлчәһрә сылуның (Ралина Гатауллина, Ралия Нигъмәтҗанова) иркә кыздан акыллы, ягымлы туташка әйләнүе, Үлмәсҗанның (Анель Имамиев) моңлы җырлавы, Карачкының (Карина Кайданова) ихлас күңеле, Агылый (Әмир Нуриев) белән Тагылыйның (Илфат Мусин) сүз көрәштерүе, Озынбикә (Хәния Гыйбадуллина) белән Кыскабикәнең (Эльвина Федотова) осталыгы, Сабый патшаның (Азамат Шәфигуллин, Эльнур Әкбәров) тапкырлыгы, җалмавыз (Эльза Емекова, Әлфия Чутаева) образлары, Елизавета Чурикованың биюе тамашачыны битараф калдырмады. Ахырдан әти-әниләрнең балалар белән бергә «Во благо вместе» хәйрия фондына рәхмәт йөзеннән багышлап җыр башкарулары дулкынландыргыч мизгел булды. Физик мөмкинлекләре чикле балаларга сәләтләрен үстерергә, иҗади камилләшергә, үзләрендә ышаныч тоярга мөмкинлек биргән мондый студияләр күбрәк булсын иде.
Эльвира МОЗАФФАРОВА.
