ИҢ ТАЛЫМСЫЗ РОЗАЛАР

Үрмәләп үсә торган роза сортлары белән таныштырсагыз иде.
Тәҗрибәсе зур булмаган кешеләр “Фламентанц”тан башлый ала. Ул бик тиз үсә, чирләргә бирешми. Икенче елны ук берничә чәчәген күрсәтәчәк, елдан-ел зураячак, матурланачак. Бу сортның бер генә кимчелеге бар, ул бер тапкыр гына чәчәк ата, бер айдан соң ялга туктый. Шуңа кышка өстәмә әзерлисе юк.
“Вартбург” (Wartburg) — 6 метрга кадәр үсә, меңләгән чәчәк бөресе формалаштыра, яфрагы да күренми. Энәсез сорт, монысы да зур өстенлек. Әмма бер тапкыр гына бер ай дәвамында чәчәк атачак. Суыкка бик чыдам, күп чирләрдән сакланган.
“Ясминә” (Jasmina) — 3 метрга кадәр үсә, клаймбер төренә керә, ягъни ботаклары калын, ике дулкында чәчәк ата. Чәчәкләре алсу төстә, җиңелчә алма исе килә. Гөмбәле чирләргә бирешми. Капламыйча -23 оСка кадәрге суыкларга түзә.
“Пьер де Ронсар” — үрмәләп үсә торган розалар арасында иң матуры дисәк тә, ялгышмабыз. Чәчәкләре актан кызгылт төскә кадәр үзгәрә, җәй башыннан көзгә хәтле чәчәк ата. Чирләргә чыдам, бездәге кышны яхшы чыга.