Авыл-районнарда, республиканың зур шәһәрләрендә бу айда Сабантуйлар гөрли. Быел дөньяда 4 меңләп Сабан туе булачак икән. Милли бәйрәм алдыннан иң матур, күркәм йолаларның берсе — бүләк җыю башкарыла. Аны төрле якта төрлечә атыйлар: бүләк җыю, сөлге җыю, бирнә җыю һәм… әрәпә җыю дип тә йөртәләр.
— Районнарда Сабан туйларына әзерлек эшләре дәвам итә. Аларның иң күңеллесе — бәйрәмгә бирнә җыюдыр, мөгаен. Бу көннәрдә Теләче районы Кече Кибәхуҗа авыл җирлеге яшьләре дә гармуннарга кушылып җырлап урам әйләнде, авылларга җыр-моң таралды. Күбесе гармунчы да бит әле егетләрнең! Һәр елдагыча авыл халкы үзенең зур өлешен кертте: сөлге, тукыма һәм башка зур бүләкләр дә бик күп җыелды. Яшь кызларның егетләргә чиккән кулъяулыгы бирүе дә сакланган бу якларда. Кызлары булган хуҗалык капка төбенә килеп баскач, “Кулъяулык чиккәннәр” дип кычкырып торалар. Булмаса – «ялкау» дип кычкыралар. Шулай булгач, чикми кара син!
Авыл уртасында әзерләнгән мул өстәлдә кайнар чәй эчеп, тәмле коймаклар белән дә сыйланды яшьләр. Авылыбызның уңган апаларына бик зур рәхмәт!
Сабан туена бүләк җыю матур гадәт, алга таба да бу матур йолаларыбыз, тальян моңнарыбыз югалмасын иде! — дип уртаклашты безнең белән Теләче районының Казаклар авылы китапханәсе хезмәткәрләре.
Лилия ЙОСЫПОВА.
