Нәзер корбанын ничек чалдырырга? Аерым догасы бармы? Итен үзеңә ашарга ярыймы?
Рания, Биектау.
Алмаз хәзрәт САФИН, “Өметлеләр” мәчете имам-хатыйбы:
— Корбанның төрләре берничә. Нәзер әйткәндә, кеше корбан чалырмын дип Аллаһы Тәгаләгә вәгъдә биргән икән, бу нәзер корбаны була. Аны мөмкинлеге булган кеше теләсә кайчан чалдыра ала. Нәзер корбанын чалу нәкъ гает корбаны кебек башкарыла. Бер үзенчәлек: нәзер корбанының итен тулысынча таратып бетерергә кирәк. Хәнәфи мәзһәбе галимнәре фикеренчә, нәзер корбаны сәдака булып саналганга, аны нәзер әйтүче кешегә һәм гаиләсенә ашарга ярамый. Мескеннәргә, мохтаҗларга таратырга була. Итеннән аш пешереп, кунак җыярга мөмкин.
Нәзер корбаны чалыр алдыннан укыла: “Аллаһүммә иннә саләәтии үә нүсүкии үә мәхйәәйәә үә мәмәәти лилләһи Раббиль гәәләмиинә ләә шәриикә ләһ”. Мәгънәсе: “Йә, Аллаһ, дөрестән дә, минем намазым һәм гыйбадәтем, яшәвем һәм үлемем барча галәмнәрнең Раббысы булган Аллаһ ризалыгы өчендер. Аллаһы Тәгаләнең һичбер тиңдәше юктыр”. Аннары “Йә, Аллаһ! Бу корбанны нәзер әйткән фәлән кешедән кабул итеп ал” дип ниятлисең һәм “Бисмилләһи вәллааһү әкбәр” дип әйтеп чаласың.
Фото: 
deksbakh/123rf.com
