Кукмара районы Зур Кукмара авылыннан Илнур Нурмөхәммәтовта тарихый мотоцикл саклана. Бу транспортка яшьләр гаҗәпләнеп караса, өлкән буынга ул яшьлеген искә төшерә.
— Илнур, әлеге мотоцикл сиңа ничек килеп эләкте?
— Бу — әтидән калган мотоцикл. 1949 елгы. Әтием — сугыш чоры баласы. Ул бу транспортны кемнән алгандыр — анысын белмим. Әмма гаражда тора иде. Аны әтием истәлеге итеп сакладым. 5-6 еллар элек сүтеп җыйдым, детальләрен яңарттым, буядым да йөри башладым.
— Бу мотоцикл белән кайларга барасың?
— Гадәттә, бу тарихый мотоцикл белән парадларда катнашам. Урам әйләнеп кайтам. Бер елны коронавирус аркасында парад булмады. Дустым Салават белән кибеттән күчтәнәчләр алдык та, хәрби киемнәр киеп, ветераннарыбызны шул мотоциклга утыртып, үзебез котларга уйладык. Өлкәннәр бу гамәлебезне хуплады, сөенделәр, күңелләре булды. Бабайлар мотоциклга утырып та карады. Урамда күрсәләр, сыйпап булса да үтәләр, “Без яшьлектә йөргән матай бит бу”, — диләр.
— Илнур, мотоциклдагы “ИМЗ-М72” дигән үзенчәлекле номер нәрсәне аңлата?
— Бу номерны истәлек өчен ясадым. “ИМЗ” — Свердловск өлкәсендәге Ирбит мотоцикл заводы. “М-72” — мотоцикл исеме. Транспортның чын номеры да бар, ул документаль теркәлгән.
— Сез Украинадагы махсус хәрби операциядәге солдатларга да ярдәм итәсез бит әле?
— Махсус хәрби операциядәге егетләребезгә гуманитар ярдәм илтәбез. Аларга анда җиңел түгел, кулыбыздан килгәнчә булышырга тырышабыз. Берничә тапкыр киемнәр, азык-төлек, башка кирәк-ярак алып бардык. Егетләрдән рәхмәт сүзе ишетү — үзе бер бәхет.
Эльвира МОЗАФФАРОВА.
