Җәй көне чаңгыда йөргән кешене күрү гаҗәп кызык икән ул. Дөресрәге, чаңгы дигәнем — роллерлар. Биатлончылар җәй көне шулай шөгыльләнә икән. Бу спорт төре турында тулырак 16 яшендә уңышларга ирешергә өлгергән биатлончы кыз Дилбәр Заһидуллина белән сөйләштек.
Дилбәр Яшел Үзән районының Татар Исламы авылыннан. Идел буе спорт һәм туризм университеты каршындагы көллияттә белем ала.
— Кечкенә вакытта бабай апа белән мине чаңгыда йөрергә алып чыгып китә иде. Чынлап торып биатлон белән шөгыльләнә башлавыма 6 ел. Норлат урта мәктәбенең IV сыйныфында укыганда, Илгиз Баһаветдинов җитәкчелегендәге чаңгы секциясенә йөри башладым һәм шуннан бирле бу спорттан аерылганым юк, ул тормыш рәвешенә әйләнде. Тора-бара чаңгы секциясе биатлон белән берләште, — дип сөйли Дилбәр.
Нәкъ шул вакыт Норлат авылына әле яңа гына хәрби хезмәттән кайткан спорт остасы Данияр Гарипов тренер итеп билгеләнә. Ул бүген дә Татарстанның биатлон буенча җыелма командасында Дилбәрнең тренеры булып тора.
— Данияр Фәһимович — спорт буенча иң якын киңәшчем һәм булышучым. Авыл җирендә биатлон белән шөгыльләнү өчен шартлар шәһәрнекеннән калыша, әмма мөмкинлекләр тудырылган. Барлык эш бер тренер җилкәсенә төшә: күнегүләр алдыннан трасса ясау, чаңгыларны һава торышына карап майлау, мылтыкларны төзекләндерү, ярышларга алып бару һәм башкалар. Тренерларга зур рәхмәт әйтәсем килә, яшьләргә сәләтләрен үстерү, спорт белән шөгыльләнү өчен шартлар тудыралар, — ди Дилбәр.
Биатлон арзанлы спорт түгел. Инвентарь кыйммәт. Бу мәсьәләдә Дилбәрнең әти-әнисе — кызларына зур терәк. Аның уңышларына сөенеп, гел ярдәм итеп торалар. Тренер Данияр Гарипов шактый инвентарьны таныш-белешләре аша таба икән. Татарстанның Биатлон федерациясе дә ярыш чыгымнарын күтәрә, һәрчак булышырга әзер.
— Биатлон — ике ярышны берләштергән спорт төре. Чаңгыда чабып килгәннән соң төз һәм тиз ата белү — аның төп асылы. Боларның икесен дә яратып, оста башкарганда гына нәтиҗәгә ирешергә мөмкин, — ди Дилбәр.
Узган сезон аның өчен уңышлы булган. Саранскида үткәрелгән Бөтенроссия биатлон ярышында Идел буе Федераль округы командасы белән берлектә
3 нче урын яулап, спорт остасы кандидаты нормативын үтәгәннәр. Ә Карелиядә Бөтенроссия Анна Богалий кубогы ярышларында 2 алтын һәм 1 бронза медаль яулап кайтканнар. Спорт остасы кандидаты исемен яклаганнар.
— Быелгы сезонның иң истә калганы: сезон башында Уфада узган ярышларда спорт остасы кандидаты нормативын үтәр өчен 0,6 секунд җитмәде. Хәзер киләсе сезонга әзерләнәбез. Кышкы нәтиҗәләребез җәйге тренировкаларга бәйле. Чаңгыны роллерга алыштырабыз, йөгерәбез, төз атарга өйрәнәбез. Иң мөһиме — сәламәт булыйк, — ди Дилбәр Заһидуллина.
Эльвира МОЗАФФАРОВА.
