«АПАНАЙ»ДА — РӘГАИБ КИЧӘСЕ

Рәҗәб аеның беренче җомгасы мөбарәк бәйрәмнәрнең берсе — Рәгаиб кичәсенә туры килә. Бу — Пәйгамбәребез (с.г.в.) әтисе Габдулла белән әнисе Әминәнең никахлашкан вакыты. Шул уңайдан Казанның «Апанай» мәдрәсәсендә күркәм чара узды. Ифтар оештырылды, Пәйгамбәребезгә салаватлар әйтелде, Коръән сүрәләре укылды. — Матди дөнья аркасында Аллаһка якын булуыбызны аңлап бетермибез, Пәйгамбәребезнең сөннәтен утәгәндә нурланабыз, Раббыбызга якын булуыбызны аңлый башлыйбыз. Рухый дәрәҗәгә ирешкән кешедәге тискәре сыйфатлар мәхәббәткә әйләнә, андыйлардан начар сүз дә ишетмисең, яман гамәл дә курмисең, — ди «Апанай» мәдрәсәсе имам-хатыйбы, «Иман» мәдәният-мәгърифәт үзәге җитәкчесе Нияз хәзрәт Сабиров. «Рәҗәб — Аллаһның ае», — диелә хәдисләрдә. Аны игелектә, гыйбадәттә уздырырга насыйп булсын.