Кышын балык тоту аеруча җаваплы, саклык кагыйдәләрен үтәү зарур. Башкортстанның Иске Балтач авылында яшәүче, журналист булып эшләүче Дамир Хәйртдинов ел әйләнәсе балыкка йөрергә ярата. Кышын балык тоту кагыйдәләрен ул аңлатып үтте.
Һәвәскәр балыкчы Дамир Хәйртдинов мәктәптә укыган чакта ук качып-посып бәкедән балык каптырырга яраткан. Ул 1982 елда беренче тапкыр кышкы балыкка барып, бәке ясап, балык тоткан.
— 2004 елдан кышкы балыкчылык белән “чирләдем” дип әйтә алам, — дип сөйләде ул. — Кичектергесез эш булмаса, атнаның бер ял көнендә энем Айдар белән Танып елгасына балыкка барабыз. Үз күзәтүләребездән чыгып әйткәндә, ай тулганда, шулай ук атмосфера басымы югары булганда, балыклар пассив. Ләкин андый чакта да вакыты-вакыты белән ерткыч булмаган балыклар яхшы чиртеп ала. Кайчак шул вакытны көтеп, көн уза. Ә ул егерме минут-ярты сәгать кенә дә булырга мөмкин. Балык актив булганда да, кайчак аның кәефенә ачкыч табу авыр.
Дамир сүзләренчә, ерткыч булмаган балыклар җимгә таләпчән. Беркөнне ул черки личинкасына яхшы капса, икенче көнне бу җим эләктерелгән кармакка килеп тә карамаска мөмкин. Шуның өчен балыкчыда берничә төрле җим булырга тиеш дип саный ул. Черки личинкасы, чебен личинкасы, камыр… Һәр балыкчының үз җае булган кебек, Дамир Хәйртдиновның да үз хәйләсе, алымы бар.
— Балыкны бер урынга җыю һәм бер урында тоту өчен азык куллану яхшы. Алар махсус кибетләрдә сатыла, — дип киңәш бирде балыкчы. — Күпчелек балыкчылар, җирле сулык үзенчәлекләрен исәпкә алып, аны үзе ясый. Безнең якларда кышын балыкка ялгызың йөрү куркыныч. Чөнки боз ватылып, суга төшү куркынычы зур. Ерткыч җәнлекләр һөҗүм итүе бар. Алар андый урыннарны ярата. Чөнки кайбер балыкчылар тоткан вак балыкларын кире җибәрми, үзләре белән алмый, бәке янында калдырып китәләр.
Һәвәскәр һәм күпьеллык тәҗрибәсе булган балыкчы киңәш иткәнчә, кышкы балыкка барып өшемәс өчен, җылы киенергә кирәк. Хәзер махсус кием сайлап алу мөмкинлеге зур.
— Җилдән саклану өчен палатка яхшы, — ди Дамир Хәйртдинов. — Шулай да һава торышы 10 оСан түбән булса, балыкка барырга атлыгып тормыйм. Башкаларга да киңәш итмәс идем.
Индира СӘЙФУЛЛИНА.
