Арчадан Илнур Яруллин җитәкчелегендәге “Заман” оешмасы, әфганчы дуслары Илсур Нигъмәтҗанов, Динар Гарифҗанов һәм башкалар белән бергәләп, хәрби операциядә катнашучы егетләргә 15 мобиль мунча ясаган. Аның бишесен шушы көннәрдә Луганск өлкәсенең Сватово шәһәренә илтеп кайттылар. Юлдан кайткан Илнур абый өч көн йокламаган булса да, безнең белән очрашырга җай тапты.
— Луганск өлкәсенә Арчадан өчәү: мин, әфганчы дустым Ринат Зарипов һәм туганым Данил Яруллин бардык. Хәрби операциядә катнашучы Татарстан егетләре белән дә күрештек. Аларга посылкалар, “Курса МТС” җитәкчесе Рәүф Гыйләҗетдинов ярдәме белән җибәрелгән 200 казылыкны тапшырдык, — дип сөйли Илнур абый.
Аның беренче тапкыр гуманитар ярдәм илтүе түгел, солдатларның хәлен яхшы аңлый, үзе дә Әфганстанда хезмәт иткән.
— Яхшы хәтерлим, сугыш вакытында суга кытлык иде, хәтта танк бакларына тутырып куя идек. Шуңа да бу мунчалар юынырга гына түгел, су запасын сакларга да ярдәм итәчәк, — ди әңгәмәдәшем. Мобиль мунчаларны сүтелгән килеш төягәннәр, баргач җыйганнар. Брезент белән капланган 3х3 метрлы корылмалар утын белән җылытыла. Су баклары 80-100 әр литрлы. Мунчаны ясаганда, Арча эшмәкәрләре Даниял Фәсәхиев, Фәнис Гәрәфиев, Илдар Йосыпҗанов металл эшләнмәләре, тимер мунча мичләре, башка кирәк-яраклар белән ярдәм иткәннәр. Илнур абый солдатларга ай саен мунчалар илтергә уйлый.
Эльвира МОЗАФФАРОВА.
