Әлки районының Алпар авылында яшәүче Илһам Фасаховка кечкенәдән техника җене кагылган. Аның әтисе озак еллар тракторда эшләгән. Шуңа да әңгәмәдәшем кечкенәдән техника арасында барысын да тотып карап, өйрәнеп үскән. Ул транспортны оста йөртүдән тыш, аларны үзе ясый да.
Мотоблоктан квадроцикл эшләгән, күп техниканы тарантаслы, арбалы итеп үзгәрткән. Кайберләрендә хатыны Фәния апа да йөри. Илһам абый үзе тыйнак, башкарган эшләре турында сөйләргә бик яратмый.
— Яз җитте, авыл “мерседес”лары гараждан чыкты. Утын ташыйбыз, печәнгә йөрибез, балыкка, гөмбәгә барабыз. Көзен урманнан гөлҗимеш, балан җыеп, кышка әзерлибез. Кая кирәк, шунда техникада рәхәтләнеп йөрибез, — дип сөйли Фәния апа, иренең ишегалдында тезелеп торган мотоцикл, машиналарына ишарәләп.
— Илһамга көзен 65 яшь тула. Олыгаеп кына танышсак та, шөкер, 13 ел тигез гомер кичерәбез. Бик уңган кеше ул. Кулыннан килмәгән эше юк. Үз кулы белән парник ясады. Сыер да сава. Мал-туарны аңлый, терлекне сыйпап кына сөйләшә, — ди хатыны Фәния апа.
Илһам абыйның техника коллекциясендә мотоцикллар аерым урын алып тора.
— Мәктәп яшендә үк мотоциклда җилдердек, — дип искә ала Илһам абый.
Моннан тыш балта остасы да әле ул. Кирәк кешегә тырма, чүкеч саплары ясап бирә. “Үзең эшләгән күңелгә якынрак”, — ди.
Эльвира МОЗАФФАРОВА.
