Саба районыннан Нәзирә Васильева авырлыклар белән күзгә-күз очрашканнан соң, өйдә перәннек, зефир, кош теле пешерү белән шөгыльләнә башлый. Тик бу гади ризыклар дип уйларга ашыкмагыз. Нәзирә апа аларны күңел җылысын биреп, бизәкләп, чын сәнгать әсәре дәрәҗәсенә җиткереп ясый.
Нәзирә апа 23 ел тәрбияче булып эшләгән. Кан басымы кисәк күтәрелә башлау сәбәпле, әлеге эшеннән китәргә туры килә аңа. Аннан Нәзирә апа “Сабантуй” спорт оешмасында бер ел методист-инструктор вазыйфасын башкара. Шул елны аңа сынау белән очрашырга туры килә. Биле авырта башлый, аннан аяклары сызлап, утыра алмау дәрәҗәсенә җитә.
— Бу хәл 5 ел элек булды. Операциягә ризалаштым, ләкин, кызганыч, файдасы тимәде. Ярты елдан, йөрергә җиңелрәк булсын дип, умырткалыкка электростимулятор куйдылар. Шуның ярдәме белән йөрим, — ди Нәзирә апа.
Йөреп эшли алмагач, нәрсә белән шөгыльләнеп була икән дип, интернетка мөрәҗәгать итә ул. Аңа перәннек пешерү курслары очрый. Аннан соң зефир һәм кош теле ясарга өйрәнгән. Биле авырткач, Нәзирә апага әлеге эшләр дә авырлык белән бирелә. Утырып эшли алмаганлыктан, бик тиз ардыра, шуңа ял итеп торырга туры килә.
— Перәннек пешерергә 2021 елда Виктория Оловянная җитәкчелегендә 3 ай өйрәндем. Зефир ясау курслары да үттем, сертификатларым бар. Кош телен пешерергә узган елның октябрендә өйрәндем. Әлегә заказларым күп дип әйтә алмыйм. Перәннекне күбрәк балалар бәйрәменә, туган көннәргә сорыйлар. Балаларга бик ошый. Зефирны — туган көннәргә, күчтәнәчкә, ә кош телен күбрәк туй, никахка әзерлим, — ди Нәзирә апа үзенең шөгыльләре турында.
Зефирны — 3, кош телен 1 көндә әзерләсә, перәннек ясарга озак вакыт китә икән. Бер көн камырын әзерләп, суыткычта тота, икенче көнне генә пешерергә ярый. Пешкәч тә, 1 көн үткәч кенә бизәргә була. Шундый катлаулы юллар узганнан соң, искиткеч матур һәм тәмле перәннек килеп чыга.
Альмира МӘҮЛЕТОВА.
