Мөслим районы Яңа Усы авылында “Бәчүк” чишмәсен яңартып ясаганнар.
“Без киләбез чишмәбезнең
Салкын суын эчәргә.
Эчкәндә үзеннән-үзе
Баш иелә чишмәгә”.
Кизләү янына әнә шундый шигырь юллары язылган таш куйганнар.
— “Бәчүк” чишмәсе авыл үзәгендә урнашкан, — дип сүз башлады Яңа Усы авыл җирлеге башлыгы Галина Романова. — Элек бу чишмәне Василий абый Егоров карап, чистартып торган. Керәшен халкы һәр исемне үзенчә татарчалап әйтә. Василий да Васюк, Бәчүккә әйләнгән. Чишмә атамасы шушы абый хөрмәтенә куелган. Егоровлар нәселен Җәгүрләр дип йөртәләр бездә. Әлеге чишмә суының тәмлелеге белән тирә-якта дан тота. Чишмә яны ямьсез тормасын дип, быел, программага кертеп, үзара салым акчасына ремонт ясарга булдык. Коесы яхшы хәлдә иде, суы әйбәт ага. Юлларын ачтык, үсенте, агачлардан чистарттык. Заманча басмалар куелды, ял зонасы, шашлык пешерү өчен дә уңайлыклар булдырылды. Чишмәгә төшә торган юл кырыен да җайладык, стоянка эшләттек. Авыл халкы эчәр суны чишмәдән ташый. “Бәчүк” суын һәркем үз итә.
Лилия ЙОСЫПОВА.
